اسلام آباد(این این آئی) سپریم کورٹ آف پاکستان نے سابق صوبائی وزیر شرجیل میمن کی ضمانت کی درخواست مسترد کردی۔پیپلز پارٹی کے رہنما اور سابق صوبائی وزیر اطلاعات شرجیل میمن پر محکمہ اطلاعات میں 5 ارب روپے سے زائد کی کرپشن کے الزامات ہیں اور اس کیس میں 23 اکتوبر کو سندھ ہائیکورٹ نے ان کی ضمانت میں توسیع کی درخواست مسترد کی جس کے بعد نیب نے انہیں احاطہ عدالت سے گرفتار کیا تھا۔منگل کو شرجیل میمن نے کرپشن کے

مقدمے میں ضمانت کے لیے سپریم کورٹ میں درخواست دائر کی تھی جس کی سماعت جسٹس آصف سعید کھوسہ کی سربراہی میں 3 رکنی بینچ نے کی۔عدالت عظمیٰ نے شرجیل میمن کے وکیل اور استغاثہ کے وکیل کے دلائل سننے کے بعد سابق صوبائی وزیر کی ضمانت کی درخواست مسترد کردی۔سپریم کورٹ نے حکم دیا کہ گرفتار افراد ضمانت کے لیے سندھ ہائیکورٹ سے رجوع کرسکتے ہیں۔عدالت عظمیٰ نے نیب کو ایک ہفتے میں جواب بھی داخل کرنے کا حکم دیا۔