اسلام آباد(مانیٹرنگ ڈیسک)قومی اسمبلی میں سابق ڈپٹی سپیکر اورپاکستان پیپلزپارٹی کے پی کے جنرل سیکریٹری فیصل کریم کنڈی نے کہا ہے کہ کے پی حکومت کو غیرپختون ٹولہ ریموٹ کنٹرول کے تحت چلا رہا ہے۔ عمران نیازی کا یہ دعویٰ کہ وہ حکومت میں آنے کے بعد آٹھ ہزار ارب روپے لائیں گے

نہ نومن تیل جمع ہوگا نہ رادھا ناچے گی کے مترادف ہے۔ کے پی میں پی ٹی آئی کی حکومت ہے عمران نیازی آٹھ ہزار ارب روپے نہیں صرف ایک ارب روپے لا کر دکھائے۔ انہوں نے کہا کہ جو شخص غریب مریضوں کے لئے ملنے والے صدقات اور خیرات کی رقم خورد برد کرے وہ ملک اور قوم کو کیا دے سکتا ہے؟ انہوں نے کہا کہ کے پی واحد صوبہ ہے جہاں یونیورسٹیوں کی فیس میں اضافہ کیا گیا ہے جو اس بات کی عکاسی ہے کہ جعلی خان نہیں چاہتے کہ غریب پختون عوام کے بچے اعلیٰ تعلیم حاصل کر سکیں۔ فیصل کریم کنڈی نے کہا کہ کے پی معدنی ذخائر بھی جعلی خان کی اے ٹی ایم مشین کے قبضے میں ہے۔ حالت یہ ہے کہ سرکاری ہسپتالوں میں ادویات نہیں، محکمہ تعلیم کی حالت خراب ہے اور تعمیری کام بھی نہ ہونے کے برابر ہیں۔ صوبے کا سارا پیسہ جعلی خان کے پیٹ میں جا رہا ہے اور جعلی خان پختون عوام کے خون اور پسینے پر پل رہے ہیں۔ فیصل کریم کنڈی نے کہا کہ پاناما چور قانون کی گرفت میں آچکا اب چندہ چور کپتان کی باری آنے والی ہے کیونکہ دونوں پر امانت میں خیانت کا الزام ہے۔ پیپلزپارٹی کے رہنما نے کہا کہ قوم حیران ہے کہ جس شخص کا کوئی ذریعہ آمدنی نہیں 400کنال پر تعمیر پرآسائش محل میں کیسے رہ سکتے ہیں؟۔

موضوعات:فیصل کریم کنڈی