اسلام آباد(این این آئی) فیض آباد دھرنے کے دوران مظاہرین نے میٹرو اسٹیشن میں توڑ پھوڑ کرکے اس کا حلیہ ہی بگاڑ دیا۔فیض آباد پر سکس روڈ اور شمس آباد میٹرو اسٹیشن میں تھوڑ پھوڑ کی گئی اور شدید نقصان پہنچا گیا، مظاہرین نے میٹرو سٹیشن پر لگی دوایلیوٹر لفٹ ناکارہ بنا دیں اور انہیں اب استعمال کرنا ممکن نہیں، یہ ایلویٹر لفٹ بزرگ شہریوں کو سیڑھیاں چڑھنے سے بچانے کو لگائی گئی تھی۔

مظاہرین کی جانب سے مری روڈ کی طرف کا ٹکٹنگ بوتھ تباہ کر دیا گیا جبکہ اے سی بھی اکھا ڑ دیا گیا۔مظاہرین نے ٹکٹنگ مشین اور اس کا رول تباہ کیا جسے اٹلی سے منگوا کر نصب کیا گیا تھا جبکہ میٹرو سے ملحق پبلک ٹوائلٹ کو بھی نا قابل استعمال بنا دیا گیا۔اس سٹیشن سے 25 ہزار سے زائد افراد روزانہ سفر کرتے تھے اور روزانہ 5 لاکھ سے زائد کی آمدن ہوتی تھی لیکن اب مرمت ہونے تک فیض آباد سٹیشن پر بس نہیں رکا کرے گی۔