اسلام آباد(مانیٹرنگ ڈیسک)عمران خان انسداد دہشتگردی عدالت میں پیش، سابق ایس ایس پی اسلام آبادعصمت اللہ جونیجو تشدد کیس میں چیئرمین تحریک انصاف کی ضمانت منظور ۔ تفصیلات کے مطابق اسلام آباد کی انسداد دہشتگردی کی عدالت نے سابق ایس ایس پی اسلام آباد عصمت اللہ جونیجو تشدد کیس میں چیئرمین تحریک انصاف عمران خان کی ضمانت منظور کر لی۔ انہیں دو دو لاکھ کے مچلکے جمع کرانے کا حکم دیا گیا ہے۔ اس سے قبل عمران خان کے وکیل بابر اعوان ایڈووکیٹ ان کی جگہ
عدالت میں پیش ہوئے تھے جس پر عدالت نے ملزم عمران خان کو عدالت پیش ہونے کا حکم دیا تھا جس پر وہ آج انسدا د دہشتگردی کی عدالت میں پیش ہو گئے۔ واضح رہے دھرنے کے دوران ریڈ زون اور سرکاری عمارتوں کی جانب بڑھنے والے لوگوں نے روکنے پر سابق ایس ایس پی اسلام آباد عصمت اللہ کو شدید تشدد کا نشانہ بنایا تھا جس پر اکسانے پر عمران خان اور طاہر القادری کے خلاف دہشتگردی دفعات کے تحت مقدمات درج کئے گئے تھے جن کی سماعت انسداد دہشتگردی کی عدالت کر رہی تھی۔
