لاہور (مانیٹرنگ ڈیسک) نیب لاہور کی جانب سے حدیبیہ پیپرز ملز کے ریفرنسز اوپن کئے جانے کے بعد شریف خاندان کے افراد نے سر جوڑ لئے ہیں اور اس سلسلے میں قانونی اور سیاسی حکمت عملی تیار کر لی ہے، بتایا گیا ہے کہ وزیراعلیٰ پنجاب شہباز شریف نے گزشتہ 24 گھنٹوں

کے دوران سابق وزیراعظم نواز شریف سے دوسری ملاقات کی، جاتی امراء میں تین گھنٹوں تک جاری رہنے والی اس ملاقات میں دونوں بھائیوں نے حدیبیہ پیپرز مل کے حوالے سے نیب ریفرنسز پر تبادلہ خیال کیا او نیب سے متعلق مختلف کیسوں پر مشاورت کی، یہ بھی بتایا گیا ہے کہ ملاقات میں وزیراعلیٰ پنجاب شہباز شریف نے اپنے بڑے بھائی نواز شریف کو ایک مرتبہ پھر اداروں سے محاذ آرائی کرنے، ریلیوں، جلسوں، جلوسوں اور احتجاج نہ کرنے کا مشورہ دیا ہے۔ سابق وزیراعظم محمد نواز شریف کی زیر صدارت ایک غیر رسمی اجلاس منعقد ہوا، جاتی امراء میں منعقد ہونے والے اس اجلاس میں سپیکر قومی اسمبلی سردار ایاز صادق، وفاقی وزیر ریلوے خواجہ سعد رفیق، سابق وزیر اطلاعات پرویز رشید، وفاقی وزیر تجارت پرویز ملک سمیت پاکستان مسلم لیگ (ن) کے دیگر رہنماؤں اور وزراء نے شرکت کی، غیر رسمی اجلاس میں نیب کی جانب سے حدیبیہ پیپرز مل کے ریفرنس اوپن کیے جانے پر تبادلہ خیال کیا گیا اور اس حوالے سے آئندہ کی سیاسی اور قانونی حکمت عملی طے کی گئی۔