اسلام آباد(مانیٹرنگ ڈیسک)ایم کیو ایم پاکستان اور پی ایس پی کی بدھ کے روز کی پریس کانفرنس دونوں جماعتوں کا آپسی اتحاد اور جمعرات کی شام ڈاکٹر فاروق ستار کی طرف سے سیاست سے کنارہ کشی کے اعلان اور 2گھنٹے بعد اعلان واپس لینے کے اعلان کے پیچھے فاروق ستار کی نہیں بانی ایم کیو ایم کی مرضی شامل تھی۔ روزنامہ خبریں کی ایک رپورٹ کے مطابق ایم کیو ایم پاکستان کا نام اور منشور ختم کرنے کے بعد بانی متحدہ نے لندن سے یہ منصوبہ بندی کی

کہ ڈاکٹر فاروق ستار پی ایس پی سے ہونے والے اتحاد سے فوری طور پر علیحدگی کا اعلان کریں۔ ذرائع کا کہنا ہے کہ ڈاکٹر فاروق ستار کی طرف سے اپنی سیاست ختم کرنے کے اعلان کے پیچھے بھی بانی متحدہ کی منصوبہ بندی شامل تھی۔ بانی ایم کیو ایم نے ڈاکٹر فاروق ستار کو سب سے زیادہ جس ایجنڈے پر کام کرنے کوکہا ہے وہ مہاجر کارڈ کو دوبارہ سے اجاگر کرنے کا ہے تاکہ کراچی میں ایک دفعہ پھر مہاجر آبادی کی مظلومیت کو ہوا دے کر حالات خراب کئے جائیں۔