اسلام آباد (این این آئی)حکومت نے مردم شماری کے عبوری نتائج کے بعد قومی اسمبلی کی نشستیں نہ بڑھانے کا اصولی فیصلہ کرلیا۔میڈیا رپورٹ کے مطابق حکومت نے قومی اسمبلی کی 272جنرل نشستوں کو صوبوں کے درمیان از سرنو تقسیم کرنے کا فیصلہ کیا ہے جس کا باضابطہ اعلان اسپیکر قومی اسمبلی سردار ایاز صادق کی زیر صدارت پارلیمانی رہنمائوں کے اجلاس میں کیا جائے گا۔ذرائع کے مطابق نئے فارمولے کے

تحت پنجاب سے قومی اسمبلی کی 9 نشستیں کم کی جائیں گی۔ پنجاب کی نشستیں 148 سے کم ہو 141 رہ جائے گی، خواتین کی مخصوص نشستیں بھی 35 سے کم ہو کر 33 رہ جائیں گی اور یوں صوبے کی کْل 9 نشستیں کم ہوں گی ٗنشستوں کی از سر نو تقسیم کے فارمولے کے تحت خیبرپختونخوا سے قومی اسمبلی کی جنرل نشستیں 35 سے بڑھ کر 39 ہو جائیں گی، مخصوص نشستیں بھی 8 سے بڑھ کر 9 ہو جائیں گی۔بلوچستان سے قومی اسمبلی کی جنرل نشستیں 14 سے بڑھ کر 16 جبکہ خواتین کی مخصوص نشستیں 3 سے بڑھ کر4 ہو جائیں گی۔وفاقی دارالحکومت اسلام آباد کی بھی ایک نشست میں اضافہ ہوگا جبکہ سندھ اور فاٹا کی نشستوں میں کوئی کمی بیشی نہیں کی جائےگی۔ذرائع کے مطابق اسپیکر قومی اسمبلی کی زیر صدارت پارلیمانی رہنمائوں کے اجلاس میں مردم شماری کی عبوری رپورٹ جلد جاری کرنے اور نئی حلقہ بندیاں کرنے کی منظوری بھی دی جائے گی۔