راولپنڈی(این این آئی)پاکستان میں متعین تھائی لینڈ کے سفیر سوچارٹ لینگ سینگ تھانگ نے کھیوڑہ میں نمک کی کانوں کا دورہ کیا ۔ اس دورے کا اہتمام منیجنگ ڈائریکٹر پاکستان ٹورازم ، چوہدری عبدالغفور خان کی ہدایت پر کیا گیا جنہوں نے سفیر کو کان آمد پر خوش آمدید کیا۔ چوہدی عبدالغفور نے کہا کہ ہم پاکستان میں سیاحت کو پھلتا پُھولتا دیکھنا چاہتے ہیں جس کیلئے ہر ممکن اقدامات کیئے جائیں گے۔
پاکستان میں موجود کھیوڑہ سالٹ مائینز اور بدھ مت کے مقامات تھائی سیاحوں کی دلچسپی کا مرکز ہیں ۔ ہماری کوشش ہے کہ دنیا بھر سے آنے والے سیاحوں کیلئے ویزا آن آرائیول کی سہولت فراہم کی جائے اس کے علاوہ تھائی کھانوں کو پاکستان میں متعارف کروایا جائے جو اپنے ذائقے اور منفرد اجزا کے باعث دنیا بھر میں مشہور ہیں۔ تھائی سفیر نے کہا کہ پاکستان میں بدھ مت کی بے شمار مقدس مقاما ت موجود ہیں لیکن صرف یہی نہیں بلکہ سیاحوں کی دلچسپی کے ان گنت مقاما ت پاکستان بھر میں پھیلے ہوئے ہیں۔ کھیوڑہ نمک کی کان حقیقی طور پر دنیا کے عجائبات میں شامل ہے اور مجھے خوشی ہے کہ حکومتِ پاکستان اس عظیم اثاثے کی مناسب دیکھ بھال کر رہی ہے۔ سلسلہ کوہ نمک میں واقع کھیوڑہ اسلام آباد سے قریباََ دو سو کلومیٹر کے فاصلے پر ضلع جہلم میں واقع ہے۔ جسے ہر سال ڈھائی لاکھ سے زیادہ سیاح دیکھنے آتے ہیں۔ کان کی سالانہ پیداوار ساڑھے تین لاکھ ٹن ہے اور اس کی دیکھ بھال پاکستان منرل ڈیویلپمنٹ کارپوریشن کر رہی ہے۔ سیاحوں کی سہولیات کے لیئے ریل کی پٹڑی بچھائی گئی ہے۔ ہر ہفتہ وار چھٹی میں ایک ہزار سے زائد طلباء و طالبات گروپ کی صورت میں کان کا دورہ کرتے ہیں۔ کان میں موجود دو سو پینتالیس فٹ اونچا اسمبلی ہال ، شیش محل ، نمک کی اینٹوں سے بنے مینار پاکستان اور مسجد سیاحوں کی دلچسپی کا باعث ہے۔ کان کے اندر درجہ حرارت سالہاسال اٹھارہ ڈگری سینٹی گریڈ رہتا ہے۔ دمہ اور سانس کی امراض کے لیئے یہاں ہسپتال بھی بنایا گیا ہے۔
