اسلام آباد(مانیٹرنگ ڈیسک)سجادہ نشین عید گاہ شریف پیر حسان الحسیب الرحمان کی رہائی، ن لیگی رہنمائوں کی پیر حسان سے ملاقات کی تصاویر سوشل میڈیا پر وائرل۔ تفصیلات کے مطابق سجادہ نشین عید گاہ شریف پیر حسان الحسیب الرحمان کی رہائی کے بعد وزیراعظم کے داماد کپٹن (ر)صفدر، ن لیگ راولپنڈی کے رہنما شکیل اعوان اور حنیف عباسی سے ملاقات کی تصویر سوشل میڈیا پر وائرل ہو گئی ہے۔

تصویر میں تینوں ن لیگ رہنما پیر حسان سے ملاقات کرتے ہوئے نظر آرہے ہیں۔واضح رہے کہ سپریم کورٹ کے ایک جج کی گاڑی پر حملے کرنے کے الزام میں سجادہ نشین پیر عید گاہ شریف پیرحسان الحسیب الرحمان کو ساتھیوں سمیت گرفتار کر لیا گیا تھا جبکہ انسداد دہشت گردی کورٹ میں ملزمان کو پیش کر کے ان کا 20دن کا جسمانی ریمانڈ بھی حاصل کر لیا گیاتھا۔ تاہم بعد ازاں صلح اور راضی نامے کے بعد پیر حسان کو رہائی ملی۔ ذرائع کے مطابق راضی نامے میں ن لیگ کے سرکردہ رہنمائوں نے اہم کردار ادا کیا ہے کیونکہ عید گاہ شریف کی راولپنڈی کی سیاست میں اہم نوعیت کو دیکھتے ہوئے حکمران جماعت ن لیگ کے رہنمائوں نے اس حوالے سے اہم کردار ادا کیا ہے۔ یاد رہے کہ پیر حسان اور ان کے ساتھیوں نے جج سردار طارق مسعود اور ان کی فیملی جو کہ لاہور سے اسلا م آباد آرہی تھی کیساتھ موٹر وے پر کسی بات پر جھگڑا کیا تھااور حملے کی کوشش کی تھی جس پر ان کے خلاف تھانہ منڈی کالوکی ضلع حافظ آبادمیں مقدمہ نمبر136درج کیا گیا تھا ، مقدمے میں انسداد دہشتگردی سمیت دیگر دفعات شامل تھیں۔