اسلام آباد(مانیـٹرنگ ڈیسک)قطر سے تعلقات کا خاتمہ، عمرہ کیلئے جانیوالے سینکڑوں پاکستانی معتمرین دوحہ ائیرپورٹ پر پھنس گئے، محصور پاکستانیوں کو وطن واپس لانے کیلئے پی آئی اے کا سپیشل آپریشن شروع کر دیا گیا۔ تفصیلات کے مطابق سعودی عرب کی جانب سے
قطر کے ساتھ تعلقات ختم کرنے کے باعث قطر ائیرویز سے عمرے پر جانے والے سینکڑوں پاکستانی معتمرین دوحہ ائیرپورٹ پر پھنس کر رہ گئے ہیں۔ پاکستانی عمرہ زائرین کو دوحہ ائیرپورٹ سے جدہ اور مدینہ روانہ ہونا تھا تاہم پرواز کی اجازت نہ ملنے کی وجہ سے وہ کئی گھنـٹوں سے ائیر پورٹ پرمحصور ہو کر رہ گئے ہیں۔ محصور ہو جانیوالے عمرہ زائرین میں بزرگ مرد و خواتین بھی شامل ہیں۔پی آئی اے کے سی ای او نیئرحیات نے محصور پاکستانیوں کو واپس لانے کے لیے خصوصی پرواز قطر روانہ کرنے کا حکم دیتے ہوئے ایئر لائن انتظامیہ کو سفارتی سطح پر رابطوں کی ہدایت کی ہے۔ترجمان دفتر خارجہ کے مطابق قطر میں پاکستانی سفارتخانہ قطر ایئر ویز اور متعلقہ اداروں سے رابطے میں ہے ،سفارتخانے کو عمرہ زائرین کو ہر ممکن مدد فراہم کرنے کی ہدایت کردی گئی ہے۔
