بیجنگ(مانیٹرنگ ڈیسک) سی پیک پر قائم مشترکہ رابطہ کمیٹی کے اجلاس میں پاکستان کے چاروں صوبوں میں چین کے تعاون سے ماس ٹرانزٹ ریل منصوبہ شروع کرنے کا فیصلہ کیا گیا ہے جس کے تحت ہزاروں کلومیٹرریلوے ٹریک کی مرمت ، تعمیر نو شروع کی جائے گی جس سے پاکستان ریلوے میں انقلابی اصلاحات ہوں گی۔
ذرائع کے مطابق وفاقی وزیر برائے منصوبہ بندی و ترقیات احسن اقبال نے سی پیک پر قائم مشترکہ رابطہ کمیٹی سے خطاب کرتے ہوئے کہا ہے کہ گوادر میں 300میگاواٹ بجلی منصوبے پر جلد کام شروع ہو گا ،گوادر میں سی پیک منصوبوں سے وہاں کے عوام کا معیار زندگی بہتر ہو گا ،اجلاس میں متعدد منصوبوں کی منظور ی دی گئی ہے،چاروں صوبوں میں ماس ٹرانزٹ ریل منصوبہ شروع کیا جائے گا۔
انہوں نے کہا ہے کہ سی پیک پاک چین دوستی کا طرہ امتیاز بن چکا ہے ، امریکا، کینڈا اور یورپ بھی سی پیک کے خطے پر اثرات پر ریسرچ کر رہے ہیں،صوبوں میں ماس ٹرانزٹ ریلوے منصوبے شروع کرنے پر چینی عزم کو سراہتے ہیں،گوادر میں اسپتال ،پینے کے صاف پانی اور ووکیشنل انسٹی ٹیوٹ قائم ہو ں گے۔
انہوں نے کہا ہے کہ صوبوں کے تجویز کردہ منصوبوں پر غور کرنے کو بھی سراہتے ہیں، سی پیک منصوبے میں شکوک و شبہات پیدا کیے گئے ، سی پیک دنیا میں علاقائی رابطے کا سب سے بڑا منصوبہ بن گیا ہے۔