کراچی(این این آئی)آل پاکستان مسلم لیگ کے سربراہ اور سابق صدرجنرل(ر) پرویز مشرف نے کہاہے کہ کسی بندے کو حق نہیں پہنچتا کہ میرے اکاؤنٹس کی مجھ سے تفصیلات پوچھے ٗاگر پیسے کا کرپشن سے تعلق ہے تو میں جوابدہ ہوں، مگر میں اپنے کسی نجی سرمائے کی تفصیلات دینے کا پابند نہیں ہوں ٗمیں اپنے خون پسینے کی کمائی کا حساب نہیں دوں گا۔نجی ٹی وی سے بات چیت میں سابق صدر نے کہاکہ میں نے دنیا بھر میں لیکچرز دے کر پیسے کمائے ٗ میں 45منٹ لیکچر دینے کا ڈیڑھ لاکھ ڈالرز لیتا ہوں۔ ایک سوال کا جواب دیتے ہوئے

انہوں نے کہا کہ سعودی عرب کے سابق فرمانروا شاہ عبداللہ نے میرے اکاؤنٹ میں پیسے جمع کروائے ٗنومبر 2009 میں میرے اکاؤنٹ میں جمع کرائے گئے پیسوں کا اکاؤنٹ ابھی بھی بند نہیں ہوا ٗانہوں نے کہاکہ مجھے صحت کی پیچیدگیاں ضرور ہیں تاہم اس کا مطلب یہ نہیں کہ میں بالکل ہی ہل جل نہیں سکتا۔ میں بالکل ٹھیک ٹھاک ہوں اور باقاعدگی سے ورزش کرتا ہوں۔ میں پاکستان واپس آنا چاہتا ہوں۔ حالات کچھ بہتر ہوجائیں تو میں ضرور پاکستان آؤں گا۔ انہوں نے کہا کہ میرے اوپر سیاسی مقدمات بنائے گئے ہیں۔ اب تک شفاف ٹرائل نہیں ہو رہا، اگر ہو رہا ہوتا تو اب تک کیس ختم ہو جاتے۔

موضوعات:سعودی عرب مسلم لیگ مشرف