اسلام آباد(مانیٹرنگ ڈیسک) پاکستان مسلم لیگ ن کے رہنما دانیال عزیز میڈیا پر حکومت کا جارحانہ انداز میں دفاع کرنے کے لئے جانے جاتے ہیں اس سلسلےمیں انہیں کئی دفعہ بہت زیادہ تنقید کا سامنا بھی کرنا پڑ جاتا ہے۔پانامہ لیکس پر حکومت کے حق میں انہوں نےبہت جارحانہ انداز میں حکومت کا دفاع کیا جبکہ تحریک انصاف اور پرویز مشرف کے خلاف بھی انہوں نے حکومت کے دفاع کرنے میں بھی کوئی کسر نہیں چھوڑی اور ڈٹ کر حکومتی موقف کا دفاع کرتے چلے آرہے ہیں۔ لیکن یہ بات بھی بہت سے لوگ جانتے ہیں کہ ایک وقت تھا کہ دانیال عزیز پرویز مشرف کی آنکھ کا تارہ بننے کے لئے ان کی بھی اسی طرح خدمت کرتے اور ان کے آگے پیچھے پھرتے نظر آتے تھے۔
سینئر صحافی اور کالم نگار محمد اظہار الحق نے اپنے ایک کالم میں انکشاف کیا ہے کہ ایک بار انہیں سابق وزیراعلیٰ پنجاب نے بتایا کہ ایک دفعہ سب کی موجودگی میں دانیال عزیز نے اپنی جیب سے رومال نکال کر صدر پرویز مشرف کی وردی (جو انہوں نے پہنی ہوئی تھی ) کو صاف کرنا شروع کر دیا ۔اس موقع پر چوہدری پرویز الہٰی نے طنزیہ انداز میں کہا کہ وردی پر گھٹا (گرد) تو نظر آنہیں رہا آپ کیا صاف کر رہے ہیں؟ جس کے جواب میں دانیال عزیز کچھ نہیں کہا اور چپ چاپ ایک طرف ہو گئے ۔ واضح رہے کہ گزشتہ دنوں تحریک انصاف کے ساتھ ساتھ میڈیا پر آکر پرویز مشرف کے اقدامات پر سخت ترین تنقید کرنے والے دانیال عزیز کا گزشتہ روز سپریم کورٹ کی عمارت میں خواجہ محمد آصف اور خواجہ سعد رفیق کے ہمراہ ڈائس پر جگہ نہ ملنے پر سینئر وفاقی وزیر طارق فضل چوہدری اور دیگر افراد سے سخت تلخ کلامی اور دھکم پیل بھی ہوئی تھی ۔