لاہور( این این آئی) جلسہ گاہ میں کارکنوں کی دھکم پیل کے باعث شدید بد نظمی دیکھنے میں آئی ، جہانگیر ترین ، شیخ رشید اور چوہدری سرور سمیت دیگر رہنما کارکنوں کی شدید دھکم پیل کا سامنا کرکے اسٹیج پر پہنچے ۔ تفصیلات کے مطابق مرکزی اسٹیج کی طرف جانے والے راستے پر کارکنوں کا بے پنا ہ رش ہونے کے باعث مرکزی رہنماؤں کو اسٹیج پر پہنچنے میں شدید مشکلات کا سامنا کرنا پڑا۔ پارٹی کے سیکرٹری جنرل جہانگیر ترین ، عوامی مسلم لیگ کے سربراہ شیخ رشید اور چوہدری سرور سمیت دیگر رہنماکارکنوں کی دھکم پیل کی
زد میں آگئے تاہم منتظمین نے بھرپور کوششوں کے بعد انہیں اسٹیج تک پہنچایا ۔ خاتون رکن اسمبلی زرتاج گل بھی کارکنوں کے رش میں پھنس کر رہ گئی جسکے بعد منتظمین نے انہیں بڑی مشکل سے وہاں سے نکالا ۔جلسہ گاہ کے مرکزی راستے پر دھکم پیل کی وجہ سے شدید بد نظمی دیکھنے میں آئی اور اسی دوران رکن قومی اسمبلی مراد سعید کے بھائی نصر اللہ خان سمیت کئی افراد کی جیبیں کٹ گئیں۔
