اسلام آباد (این این آئی)وفاقی وزیرداخلہ چوہدری نثار علی خان نے مینوئل اسلحہ لائسنس ہولڈر ز کو اپنے لائسنس کی تجدید کیلئے آخری بار 6ماہ کی توسیع دینے کااعلان کرتے ہوئے ای پاسپورٹ شروع کر نے کی اصولی منظوریدیدی ہے ٗ اسلحہ لائسنس کی تجدید نہ کرانے پر خودبخود یہ لائسنس منسوخ ہو جائیں گے ۔ جمعہ کووزارت داخلہ میں وزیرداخلہ چوہدری نثار علی خان کی صدارت میں اعلیٰ سطح کا اجلاس منعقد ہوا جس میں سیکرٹری داخلہ، خصوصی سیکرٹری داخلہ ،ڈی جی ایف آئی اے، ڈی جی امیگریشن و پاسپورٹ کے علاوہ وزارت کے اعلیٰ حکام نے شرکت کی ۔اجلاس کے دوران بتایاگیاکہ گزشتہ سال دسمبر میں اسلحہ کی تجدید کی مہم ختم ہونے پر ایک لاکھ 80ہزار اسلحہ لائسنس کمپیوٹرائزڈ کرائے گئے یاان کی وزارت داخلہ سے تصدیق کی گئی ٗ اس مہم کے دوران 8ہزار سے زائد اسلحہ لائسنس جعلی نکلے ۔ وزیر داخلہ نے ہدایت کی کہ جعلی لائسنس رکھنے والوں کے خلاف ایف آئی آر کااندراج کیاجائے اور ایف آئی اے اس کی تفصیلی انکوائری کاانعقاد کرے ۔ وزیر داخلہ کو بتایاگیاکہ بقیہ لائسنسوں کی تجدید نہ ہونے کی ایک وجہ لائسنس ہولڈرز کی آگاہی نہ ہونا بھی ہے ۔ گزشتہ تجدید ی مہم کے دوران عوام کو درپیش مختلف مسائل کے بارے میں میڈیارپورٹس کا نوٹس لیتے ہوئے وزیر داخلہ نے وزارت داخلہ اور نادرا کو ہدایت کی کہ وہ اس بارے میں آگاہی کیلئے فعال میڈیا مہم شروع کریں اور تجدید نو کے عمل میں بیوروکریسی کے طرز عمل کی مشکلات کو ختم کریں۔ اس موقع پر ڈی جی امیگریشن و پاسپورٹس نے اجلاس کو ای پاسپورٹ کے اغراض و مقاصد کے حوالے سے بتایاکہ ہر ای پاسپورٹ پر نصب مائیکرو چپ سے مسافر کی مستند نشاندہی میں مدد ملے گی۔ وزیر داخلہ نے کہا کہ پاکستانی سفری دستاویز ات کے غلط استعمال اور اس میں رد وبدل سے عالمی سطح پر پاکستان کی ساکھ کو بڑا نقصان پہنچا ہے جو ایک سنجیدہ مسئلہ ہے ۔ انہوں نے کہاکہ انسانی سمگلروں کی جانب دستاویزات میں رد وبدل روکنے کیلئے ضروری ہے کہ ایسی دستاویز ات ہوں جن کی نہ تو نقل بنائی جاسکے اور نہ ہی ان میں کوئی ٹمپرنگ ممکن ہو ۔وزیرداخلہ نے کہاکہ ہم ای پاسپورٹ متعارف کروا کر انسانی سمگلنگ کی لعنت کا پاکستانی سرزمین سے خاتمہ چاہتے ہیں جوکہ ایک بین الاقوامی مسافروں کیلئے مستقبل میں نئی ڈیجیٹل دستاویز ہو گی۔ وزیرداخلہ کو بتایاگیاکہ ای پاسپورٹ میں ترمیم کے ذریعے پاسپورٹ حکام اور پاکستانی امیگریشن کاعملہ مزید درکار اطلاعات شامل کر سکے گا۔ وزیر داخلہ نے ڈی جی آئی ایم پی اے ایس ایس کو ہدایت کی کہ ای پاسپورٹ کی پرنٹنگ اور معیار کیلئے مستقل بنیادوں پر جدید ٹیکنالوجی کی حامل جدید ڈیجیٹل پرنٹنگ مشینیں حاصل کی جائیں۔یہ ای پاسپورٹ پراجیکٹ 2017ء میں مکمل طور پر آپریشنل ہوگا۔