ملتان(نیوزڈیسک) نجی فیکٹری کے پلانٹ میں گیس لیکیج کے باعث خواتین سمیت 36 ملازمین بے ہوش ہوگئے۔اطلاعا ت کے مطابق ملتان میں قائم بسکٹ بنانے کی ایک فیکٹری میں چند روزقبل ہی نیا پلانٹ نصب کیا گیا تھا ٗ گزشتہ روزپلانٹ سے زہریلی گیس کے اخراج کے باعث اسے بند کردیا گیا تاہم بدھ کی صبح جب اسے دوبارہ چلایا گیا تو کچھ ہی دیرمیں پلانٹ سے دوبارہ گیس خارج ہونے لگی۔ گیس لیکیج کے باعث وہاں کام کرنے والے 36 مزدور بے ہوش ہوگئے۔فیکٹری مالکان نے معاملہ دبانے کے لئے ریسکیو 1122 کے بجائے اپنی گاڑیوں پر نجی ہسپتال منتقل کیا ٗہسپتال منتقل ہو نے والے مزدوروں کے اہل خانہ کو بھی واقعہ کی اطلاع نہیں دی گئی۔ ہسپتال انتظامیہ کے مطابق زیر علاج ملازمین میں خواتین کی بڑی تعداد ہے ٗ کئی کی حالت تشویشناک ہے۔