اسلام آباد (نیوڈیسک) عوامی مسلم لیگ کے سربراہ شیخ رشید احمد نے کہا ہے کہ اگر حکومت نے چیف جسٹس آف پاکستان کی سربراہی میں جوڈیشل کمیشن نہ بنایا تو لاہور میں دما دم مست قلندر شروع ہو گا‘ چیف جسٹس کی سربراہی میں جو کمیشن بنایا جائے گا اس کی قانونی اور اخلاقی حیثیت ہو گی جبکہ حکومت کا اخلاقی جواز ختم ہو چکا ہے۔ ان خیالات کا اظہار انہوں نے پیر کو پارلیمنٹ ہاﺅس کے باہر میڈیا سے گفتگو کرتے ہوئے کیا۔ انہوں نے کہا کہ دنیا میں سب سے بڑا بجٹ پاکستانی سربراہ کا ہے اگر رائے ونڈ نواز شریف کا ذاتی گھر ہے تو وہ اس پر سرکاری وسائل کیوں خرچ کر رہے ہیں۔ انہوں نے کہا کہ عمران خان نے 2 نئی باتیں کی ہیں جس میں ایک چیف جسٹس کی سربراہی میں کمیشن بنایا جائے دوسرا نواز شریف کو استعفیٰ دینا چاہئے۔ انہوں نے کہا کہ حکومت کمیشن کا اعلان کر کے پھنس گئی ہے اور ان کے پاس اخلاقی جواز خمت ہو چکا ہے۔ انہوں نے کہا کہ چیف جسٹس کی سربراہی میں جو کمیشن بنایا جائے گا اس کی قانونی اور اخلاقی حیثیت ہو گی ایک سوال کے جواب میں انہوں نے کہا کہ اپوزیشن ساتھ دے نہ دے قوم عمران خان کا ساتھ ضرور دے گی۔ انہوں نے کہا کہ اگر چیف جسٹس کی سربراہی میں کمیشن نہ بنایا گیا تو لاہور میں دما دم مست قلندر ہو گا۔ شیخ رشید نے کہا کہ 2016ءاہم سال ہے۔