اسلام آباد (این این آئی) آزاد کشمیر کے انتخابات کیلئے پاکستان مسلم لیگ (ن) آزاد کشمیر سے تمام حلقوں سے 230 امیدواروں نے انتخابات میں حصہ لینے کی خواہش کا اظہار کرتے ہوئے ٹکٹ کے حصول کیلئے درخواستیں جمع کرادیں۔ پاکستان مسلم لیگ (ن) آزاد کشمیر کے پارلیمانی بورڈ کا اجلاس ہفتہ کو یہاں پنجاب ہاؤس میں منعقد ہوا۔ اجلاس کی صدارت مسلم لیگ (ن) کے چیئرمین راجہ ظفرالحق نے کی۔ اس موقع پر وفاقی وزیر اطلاعات و نشریات سینیٹر پرویز رشید، وزیراعظم کے معاون خصوصی ڈاکٹر آصف کرمانی، وزیراعلی گلگت بلتستان حفیظ الرحمان، وفاقی وزیر امور کشمیر برجیس طاہر، سردار سکندر حیات خان، راجہ فاروق حیدر، شاہ غلام قادر، چوہدری طارق فاروق، ڈاکٹر نجیب خان نقی، چوہدری محمد عزیز، سردار عبدالخالق وصی، سردار مہتاب احمد خان، نصیب اللہ گردیزی اور صدیق الفاروق بھی موجود تھے۔ اس موقع پر میڈیا سے گفتگو کرتے ہوئے وزیراعظم کے معاون خصوصی ڈاکٹر آصف کرمانی نے کہا کہ پاکستان مسلم لیگ (ن) آزاد کشمیر کے پارلیمانی بورڈ کے اجلاس میں میرپور ڈویژن کے حلقہ ایل اے 1 تا ایل اے 12 کے امیدواروں نے بورڈ کے سامنے اپنے اپنے حلقہ کی انتخابی صورتحال سے آگاہ کیا اور موزوں امیدواروں کو ٹکٹ دینے کیلئے اپنی سفارشات سے آگاہ کیا۔ تمام امیدواروں نے دوران انٹرویو اس بات کی یقین دہانی بھی کرائی کہ پاکستان مسلم لیگ (ن) کے صدر وزیراعظم محمد نواز شریف جس کو بھی امیدوار نامزد کریں گے وہ اس امیدوار کی انتخابی مہم کو اپنی مہم سمجھ کر چلائیں گے۔ انہوں نے کہا کہ تمام امیدواروں کے انٹرویو مکمل ہونے کے بعد بورڈ اپنی سفارشات پارٹی کے صدر اور وزیراعظم محمد نواز شریف کو پیش کر دے گا جو پارٹی کیلئے امیدواروں کا حتمی اعلان کریں گے۔ ڈاکٹر آصف کرمانی نے کہا کہ آزاد کشمیر کے انتخابات کیلئے پاکستان مسلم لیگ (ن) آزاد کشمیر سے تمام حلقوں سے 230 امیدواروں نے انتخابات میں حصہ لینے کی خواہش کا اظہار کیا اور ٹکٹ کے حصول کیلئے درخواستیں جمع کرائیں۔ ۔ انہوں نے کہا کہ بورڈ کے اجلاس میں دی گئی آراء کی رپورٹ مرتب کر کے اسے حتمی فیصلہ کیلئے پاکستان مسلم لیگ (ن) کے صدر محمد نواز شریف کو پیش کی جائے گی ، حتمی امیدواروں کا فیصلہ پارٹی کے صدر کریں گے۔