کراچی (این این آئی) رکن قومی اسمبلی نبیل گبول نے دعوی کیاہے کہ پاکستان تحریک انصاف کے چیئرمین عمران خان دھرنا کرنے جارہے ہیں ، عمران خان اگر دھرنادیتے ہیں تو ساری پارٹیز ان کاساتھ دیں گے لیکن فضل الرحمان ساتھ نہیں دیں گے ، پہلے پیپلزپارٹی بھی شاید ساتھ نہ دیتی لیکن سندھ میں نیب آپریشن شروع ہونے کے بعد پیپلزپارٹی حکمرانوں کو ہٹانے کیلئے عمران خان کا ساتھ دے گی ، بیٹوں کے کاروبار کا ذکر نہ کرنے پر نوازشریف کی اسمبلی رکنیت بھی ختم ہوسکتی ہے۔نجی ٹی سے گفتگو کرتے ہو ئے نبیل گبول نے کہا کہ عمران خان سمیت وزیراعظم کے اعلان کردہ کمیشن کو ماننے کیلئے کوئی تیارنہیں ، عمران خان باہر نکلیں تو مولانافضل الرحمان کے علاوہ سب ساتھ دیں گے۔ ایک سوال کے جواب میں نبیل گبول نے کہا کہ اپوزیشن لیڈر نے پی ٹی آئی رہنماؤں سے ملاقات کی ہے اور اپنی جماعت کا موقف پہنچادیااور ساتھ دینے کی یقین دہانی کرائی ، کچھ عرصہ قبل تک پیپلزپارٹی نوازشریف کیساتھ تھی لیکن جب سے نیب اور رینجرزنے سندھ میں کارروائیاں شروع کیں تو اب پیپلزپارٹی عمران خان کاساتھ دے گی۔نبیل گبول نے کہا کہ اگرنوازشریف نے کارکردگی نہ دکھائی تو عوام سڑکوں پر ہوں گے اور اب وہی انگلی اٹھائیں گے ، اگر نوازشریف نے اپنے اثاثہ جات میں بیٹوں کے کاروبار کا ذکر نہیں کیا تو ان کی اسمبلی رکنیت ہی معطل ہوسکتی ہے ۔