اسلام آباد (نیو زڈیسک) پاکستان تحریک انصاف کے چیئرمین عمران خان نے پی ٹی وی اور پارلیمنٹ حملہ کیس میں گرفتار کارکنان کی بریت کی درخواست دائر کرنے کا اعلان کرتے ہوئے کہا ہے کہ کارکنان کے خلاف تمام کیسز ختم کئے جائیں، دھرنا دینے والے کارکنان جمہوریت کے ہیرو ہیں، انصاف نہ ملا تو پھر سڑکوں پر آئیں گے۔ وہ منگل کو انسداد دہشت گردی کی خصوصی عدالت کے باہر میڈیا سے گفتگو کر رہے تھے۔ تحریک انصاف کے چیئرمین عمران خان انسداد دہشت گردی عدالت میں پی ٹی وی اور پارلیمنٹ حملہ کیس کی سماعت کے موقع پر کارکنوں سے اظہار یکجہتی کےلئے پہنچے اور کارکنان سے ملاقات کی۔ عمران خان نے میڈیا سے گفتگو کرتے ہوئے کہا کہ 20ماہ سے کارکنوں پر مقدمات چل رہے ہیں، دھرنے میں شرکت کرنے پر ان لوگوں پر مقدمات قائم کئے گئے، جمہوریت میں پرامن احتجاج ہر شہری کا حق ہے،عوام اپنے حقوق کےلئے سڑکوں پر نکلتے ہیں۔ انہوں نے کہا کہ پاکستان کے اربوں روپے چوری کر کے بیرون ملک بھیجے گئے، کیا چوروں کو انصاف کا نظام نہیں پکڑ سکتا،22 سیاسی جماعتوں نے کہا کہ الیکشن میں دھاندلی ہوئی، چوری اور منی لانڈرنگ سے پیسہ باہر بھیجنے والوں کو کون پکڑے گا،جج صاحب سے اپیل کروں گا کہ ظلم کو ختم کیا جائے۔ عمران خان نے کہا کہ دھرنے میں شریک ہونے والوں نے کون سی دہشت گردی کی تھی، جمہوریت میں اپنے حق کےلئے احتجاج کرنا عوام کا حق ہے، ہمارے ملک میں ٹیکس چوروں کے خلاف کارروائی نہیں ہو سکتی، کیا یہ لوگ خلائی مخلوق ہیں جو ان کا احتساب نہیں ہو سکتا۔ عمران خان نے سوال کیا کہ دنیا بھر میں پانامہ لیکس پر تحقیقات ہو رہی ہیں پاکستان میں کیوں نہیں ہو رہیں؟، میں نے کوئی جرم نہیں کیا اس لئے ضمانت نہیں کراﺅں گا، جن لوگوں نے جرم کیا پیسے باہر بھجوائے وہ دندناتے پھر رہے ہیں۔ عمران خان نے پی ٹی وی اور پارلیمنٹ حملہ کیس میں گرفتار کارکنان کی بریت کی درخواست دائر کرنے کا اعلان کرتے ہوئے کہا ہے کہ کارکنان کے خلاف تمام کیسز ختم کئے جائیں، دھرنا دینے والے کارکنان جمہوریت کے ہیرو ہیں، انصاف نہ ملا تو پھر سڑکوں پر آئیں گے۔