لاہور( نیوزڈیسک)عوامی مسلم لیگ کے سربراہ شیخ رشید احمد نے کہا ہے کہ ہمارے حکمران جس طرح ملک کی رنگ برنگی تصویر پیش کر رہے ہیں حقائق اس کے بالکل برعکس ہیں،حکمران بتائیں”را“ کے افسر کی گرفتاری پر انہیں سانپ کیوں سونگھ گیا ہے ؟،حکومت کی طرف سے عوام پر ڈھائے جانے والے مظالم میںاپوزیشن بھی برابر کی شریک ہے ۔ایک انٹر ویو میں شیخ رشید احمد نے کہا کہ امن و امان اور دیگر معاملات کی وجہ سے ملک کے حالات انتہائی نازک ہیں لیکن حکمران بتا رہے ہیں کہ راوی چین ہی چین لکھتا ہے ۔ انہوں نے کہا کہ پنجاب میں میرٹ اور شفافیت کے بڑے بلندو بانگ دعوے کئے جاتے ہیں لیکن جب کرپشن سے پردہ اٹھنے کا سلسلہ چل نکلا تو کرپشن کی غضب کہانیوں کی سیریز چلے گی۔ انہوں نے کہا کہ حکمران ملک کی جو تصویر پیش کر رہے ہیں وہ حقیقت میں اپنے حوالے سے ہے کہ انکے لئے سب اچھا ہے جبکہ عوام کے لئے تصویر دھندلی ہے اور اب عوام کی آنکھیں بھی کھلنا شروع ہو گئی ہیں۔انہوں نے کہا کہ عوام اگر اب بھی سوئے رہے تو پھر اللہ ہی حافظ ہے ۔ شیخ رشید نے کہا کہ میرے پاس جو مینڈیٹ ہے میں اپنا بھرپور کردار ادا کر رہا ہوں اور جب تک ایک بھی سانس باقی ہے اس کردار کو نبھاتا رہوں گا۔