فیصل آباد(نیوزڈیسک)مسلم لیگ ن کے سابق رہنما اور مارکیٹ کمیٹی کے چیئرمین اصغر عرف بھولا گجر قتل کیس کے اہم ملزم نوید عرف کمانڈر نے عدالت میں اعتراف کیا کہ اس نے وزیر قانون پنجاب راناثناء اللہ کے کہنے پر بھولا گجر کو قتل کیا ۔ایک نجی ٹی وی چینل کے مطابق عدالت نے ملزم نوید کے اعترافی بیان پر ق تفتیش کاحکم دیتے ہوئے کہاہے کہ ایس پی سے کم رینک کے افسر کو تفتیش نہ دی جائے ۔ملزم نے دوران تفتیش بتایاکہ رانا ثناء اللہ نے اس سے کہا تھا کہ بھولا گجر ان کے لیے مسائل پیدا کررہاہے اور وہ چھوڑ کر پی ٹی آئی میں شامل ہونے والا ہے ۔روزنامہ اوصاف اسلام آباد کے مطابق ملزم کا مزید کہنا تھا کہ بھولا گجر کو قتل کرنے کی منصوبہ بندی اس نے رانا ثناء اللہ کے ڈیرے پر کی ، بھولا گجر کوقتل کرنے کے بعد راناثناء اللہ کو وائبر کے ذریعے آگاہ کیا ،رانا ثناء اللہ نے اسے بھرپور مددکا وعدہ بھی کیا تھا ۔تحریک انصاف کے رہنما اعجاز چودھری نے تبصرہ کرتے ہوئے کہا کہ وزیر قانون ہی قاتل ہوتو انصاف کی امیدنظر نہیں آتی ، رانا ثناء اللہ کو گرفتار کرکے مقدمہ چلایا جائے ، رانا ثناء اللہ کے خلاف پنجاب اسمبلی میں بھی قرار داد لائی جائے گی ۔