کراچی (آن لائن ) وفاقی اینٹی کرپشن عدالت کراچی نے ٹڈاپ کیس میں پیپلز پارٹی کے رہنما مخدوم امین فہیم کے عدم حاضری پر وارنٹ گرفتاری جاری کر دیئے جبکہ سابق وزیر اعظم یوسف رضا گیلانی کی ٹڈاپ کیس سمیت مختلف نوعیت کے 9کیسوں میں ضمانت میں توسیع کرتے ہوئے ضمانت کی توثیق کے لیے فیصلہ19نومبر تک محفوظ کر لیا ہے آئندہ سماعت پر یوسف رضا گیلانی کیخلاف 9کیسوں میںضمانت سے متعلق فیصلہ سنایا جائے گا ۔ جمعرات کے روز انسداد بد عنوانی کی وفاقی عدالت کراچی میں امین فہیم یوسف رضا گیلانی سمیت دیگر افراد کیخلاف ٹداپ کیس کی سماعت ہوئی ہے جسمیں امین فہیم کے پیش نہ ہونے پر عدالت نے انکے وارنٹ گرفتاری جاری کردئیے ہیں اور آئند سماعت پر گرفتار کر کے عدات کے روبرو پیش کرنے کا حکم دیدیا ہے ، تاہم ٹداپ کیس میں یو سف رضا گیلانی اپنے وکیل فاروق ایچ نائیک کے ہمراہ عدالت میں پیش ہوئے ہیں اور ٹڈاپ کیس میں عدالت سے ضمانت میں توثیق کی استدعا کی ہے ، عدالت نے ضمانت میں توثیق سے متعلق فیصلہ محفوظ کر لیا ہے جسے 19نومبر کو سنایا جائے گا عدالت نے یوسف رضا گیلانی کی دیگر مقدمات میں ضمانت کی توسیع کرتے ہوئے کیس کی سماعت 19نومبر تک ملتوی کر دی ہے ، عدالت کے باہر میڈیا سے گفتگو کرتے ہوئے یوسف رضا گیلانی نے کہا ہے کہ حکومت میرے خلاف انتقا می کارروائی کر رہی ہے لیکن ہم عدالتوں کا احترام کرتے ہیں اس لیے اپنا دفاع کرنے کے لیے عدالت میں پیش ہو رہے ہیں ، ہم جذباتی لوگ نہیں کہ عدالتوں میں آنے سے شرمائیں ہم پہلے بھی عدالتوں کے احترام میں عدالت میں پیش ہوتے رہے ہیں اور آگے بھی پیش ہونگے ، انہوںنے کہا کہ میں مانتا ہوں کے یہ کیس پیپلز پارٹی کے دور میں بنائے گئے ہیں لیکن ان کیسوں میں میرا نام بعد میں سیاسی انتقام لینے کے لیے ڈالا گیا تھا ،انہوں نے کہا ہے کہ تمام چورو ں کو میرے خلاف وعدہ معاف گواہ بنا لیا گیا ہے اور ایک شخص کو وعدہ معاف گواہ بنا کر میرے خلاف 21مقدمے بنا لیے گئے ہیں،اس موقع پر یوسف رضا گیلانی کے وکیل و سابق وزیر قانون فاروق ایچ نائیک نے کہا ہے کہ یوسف رضا گیلانی پر بنائے گئے کیسوں دفاع کریں گے ،حکومت کی جانب سے کئے گئے انتقامی کارروائیاں ناکام ہوں گی ،حکومت سیاسی انتقام کیلئے اداروں کا استعمال کرنا چھوڑدے ۔