کراچی(نیوز ڈیسک) بلدیہ عظمیٰ نے صدر کی سڑکوں کو پارکنگ فری بنانے کے لیے پارکنگ پلازہ تا زینب مارکیٹ، سنگر چوک، الیکٹرونکس مارکیٹ اور صدر جی پی او تک مفت شٹل سروس شروع کردی ہے۔تفصیلات کے مطابق شہر کے قلب صدر کے جن علاقوں میں فری شٹل سروس شروع کی گئی ہے ان علاقوں میں کوئی بھی شہری گاڑی یا موٹرسائیکل پارک نہیں کرسکے گا شہری پارکنگ پلازہ میں گاڑیاں کھڑی کرکے شٹل سروس کے ذریعے ان علاقوں میں آمدورفت کی سہولت حاصل کریں گے، ترجمان بلدیہ عظمیٰ کے مطابق بلدیہ عظمیٰ کی شہریوں کو دی جانے والی اس سہولت سے جمعرات کو صدر پارکنگ پلازہ میں کھڑی ہونے والی گاڑیوں کی تعداد میں اضافہ ہوگیا ہے۔شہریوں سے کہا گیا ہے کہ وہ بلدیہ عظمیٰ کی جانب سے دی جانے والی اس سہولت سے فائدہ اٹھائیں، بلدیہ عظمیٰ نے صدر کے علاقے میں ٹریفک کو بہتر انداز میں رواں رکھنے کے لیے صدر کی تمام اہم سڑکوں سے ٹریفک پولیس کے ذریعے گاڑیوں کی پارکنگ ختم کرنے کے لیے اقدامات شروع کردیے ہیں۔متبادل پارکنگ کے طور پر شہریوں کی سہولت کے لیے بلدیہ عظمیٰ کے لائنز ایریا میں قائم پارکنگ پلازہ کو آج سے مکمل طور پر فعال کردیا گیا ہے یہاں ارزاں نرخوں پرگاڑیوں کی پارکنگ کی سہولت مہیا کی جا رہی ہے، ایڈمنسٹریٹر کی ہدایت پر لائنز ایریا پارکنگ پلازہ کا انتظام محکمہ چارجڈ پارکنگ سے لے کر ٹرانسپورٹ اینڈ کمیونی کیشن ڈپارٹمنٹ کو منتقل کردیا گیا ہے، پارکنگ پلازہ میں صاف ستھرے باتھ روم ، انتظار گاہ، وضو اور نماز کی سہولت مہیا کرکے صفائی اور رنگ و روغن کردیا گیا ہے۔بلدیہ عظمیٰ کراچی کی طرف سے پارکنگ پلازہ کو استعمال کرنے والے شہریوں کے لیے پارکنگ پلازہ سے صدر کی اہم مارکیٹوں تک سفر کے لیے مفت شٹل سروس مناسب وقفے سے چلائی جا رہی ہے جس کے لیے2 روٹس کا انتخاب کیا گیا ہے پہلا روٹ پارکنگ پلازہ تا زینب مارکیٹ چوک براستہ ایمپریس مارکیٹ، سنگرچوک اور دوسرا روٹ پارکنگ پلازہ تا الیکٹرونکس مارکیٹ براستہ ایمپریس مارکیٹ صدر جی پی او چوک ہے۔بلدیہ عظمیٰ کے محکمہ انسداد تجاوزات نے صدر میں میگزین لائن اور گل پلازہ کے اطراف قائم تجاوزات کے خلاف کارروائی کرتے ہوئے سڑک اور فٹ پاتھ سے بڑی تعداد میں آہنی کاو¿نٹرز، ٹیبلوں اور سامان کو ہٹادیا جس کے بعد سڑک پر ٹریفک کی روانی بحال ہوگئے