اسلام آباد (نیوز ڈیسک)پاکستان تحریک انصاف (پی ٹی آئی) نے اسلام آباد کی جانب شیڈول لانگ مارچ 5 اکتوبر تک ملتوی کرنے کا فیصلہ کر لیا ہے۔

ذرائع کے مطابق یہ فیصلہ پارٹی کی سیاسی کمیٹی کے اہم اجلاس میں تفصیلی مشاورت کے بعد کیا گیا۔ اجلاس میں لانگ مارچ کی نئی تاریخ کے ساتھ ساتھ موجودہ سیاسی صورتحال اور آئندہ کی حکمت عملی پر بھی غور کیا گیا۔پی ٹی آئی کی جانب سے لانگ مارچ پہلے 27 ستمبر کو کرنے کا اعلان کیا گیا تھا، تاہم پارٹی قیادت نے مشاورت کے بعد اسے اکتوبر تک مؤخر کرنے کا فیصلہ کیا ہے۔ذرائع کا کہنا ہے کہ نئی تاریخ کے حوالے سے پارٹی رہنماؤں اور کارکنوں کے لیے آئندہ کا لائحہ عمل جلد جاری کیا جائے گا، جس میں مارچ کی تیاریوں اور عملی حکمت عملی سے متعلق ہدایات شامل ہوں گی۔اس سے قبل پشاور میں پی ٹی آئی کی اعلیٰ قیادت کے اجلاس میں بھی لانگ مارچ کے شیڈول پر تفصیلی غور کیا گیا تھا۔

اجلاس کے دوران بعض رہنماؤں کی جانب سے احتجاج کو اکتوبر کے پہلے ہفتے تک آگے بڑھانے کی تجاویز سامنے آئی تھیں۔ذرائع کے مطابق اجلاس میں جمعیت علمائے اسلام (ف) اور پاکستان پیپلز پارٹی سمیت دیگر سیاسی جماعتوں سے رابطوں کا بھی جائزہ لیا گیا۔ پیپلز پارٹی کے ساتھ آئندہ سیاسی معاملات پر پیش رفت کے لیے بلاول بھٹو زرداری کی وطن واپسی کا انتظار کیے جانے کی بات بھی سامنے آئی۔پارٹی قیادت کی جانب سے 6 سے 10 اکتوبر کے درمیان آل پارٹیز کانفرنس کے انعقاد کی تجویز پر بھی غور کیے جانے کی اطلاعات ہیں۔اجلاس میں محمود خان اچکزئی اور راجہ ناصر عباس کے سیاسی کردار سے متعلق بعض شرکا نے اپنے تحفظات بھی بیان کیے اور اس معاملے پر پارٹی کی آئندہ حکمت عملی پر تبادلہ خیال کیا۔