لاہور ( این این آئی) انسپکٹر جنرل پولیس پنجاب ڈاکٹر عثمان انور نے حال میں سوشل میڈیا پرنامناسب حرکات کی وجہ سے وائرل ہونے والے کانسٹیبل، اس کی والدہ اور معالجین سے ملاقات کی اور زیر علاج شاہد ذوہیب کو گلے لگایا۔
آئی جی پولیس عثمان انور نے پنجاب انسٹیٹیوٹ آف مینٹل ہیلتھ کا دورہ کیا اور وہاں پر کانسٹیبل شاہد عباس کو گلے لگاتے ہوئے جلد صحت یابی کے لیے نیک خواہشات کا اظہار کیا۔عثمان انورنے ماہر نفسیات ڈاکٹر اسد سے کانسٹیبل شاہد کے علاج معالجے بارے تفصیلی گفتگو کی، آئی جی پنجاب کا کہنا تھا کہ کسی کی بیماری کا مذاق بنانا مریض اور اہل خانہ کے ساتھ زیادتی کے مترادف ہے۔
انہوں نے کہا کہ بائی پولر ڈس آرڈر قابل علاج مرض ہے، ایسے مریض کو میمز وارکا حصہ بنانے کی بجائے اس کی صحت یابی کیلئے دعا کریں۔شاہد زوہیب کا علاج بہترین ماہرین نفسیات کی زیر نگرانی جاری ہے۔آئی جی پنجاب نے کہا کہ کانسٹیبل شاہد کو لاک اپ میں رکھنے کا دعوی غلط اور حقائق کے برعکس ہے۔
