اسلام آباد(این این آئی)پاکستان تحریک انصاف کے رہنما علی محمد خان نے کہا ہے کہ پرویز خٹک عزت کے دائرے میں رہ کر سیاست کریں،پرویزخٹک کو پی ٹی آئی کا حصہ بننے سے پہلے کوئی جانتا تک نہیں تھا،مثبت سیاست کریں گے تو ہم بھی ان کی تعریف کریں گے،شاہ محمود قریشی عدالتوں میں پیش ہو رہے ہیں ،گرفتاری کی کیا ضرورت تھی۔
نجی ٹی وی کے پروگرام میں گفتگو کرتے ہوئے علی محمد خان نے پرویز خٹک کے حوالے سے سوال پر کہاکہ کون پرویزخٹک؟ وہ شخص جس کو چیئرمین پی ٹی آئی نے وزیراعلیٰ اور پھر وزیر دفاع بنایا تھا؟۔انہوں نے کہا کہ پرویزخٹک کو پی ٹی آئی کا حصہ بننے سے پہلے کوئی جانتا تک نہیں تھا،وہ سیاست کریں لیکن عزت کے دائرے میں رہیں،مثبت سیاست کریں گے تو ہم بھی ان کی تعریف کریں گے۔شاہ محمود قریشی کی حالیہ گرفتاری سے متعلق انہوںنے کہاکہ شاہ محمود قریشی عدالتوں میں پیش ہو رہے ہیں ،گرفتاری کی کیا ضرورت تھی،ان کی گرفتاری سے گھمبیر سیاسی صورتحال میں مزید اضافہ ہوگا۔
علی محمد خان نے انتخابات کے حوالے سے کہا کہ آئین میں بالکل واضح ہے کہ اسمبلی تحلیل ہو تو 90دن میں الیکشن کرانا ہونگے۔انہوںنے کہاکہ سی سی آئی کی میٹنگ میں نگراں وزرائے اعلیٰ صوبے کی پالیسی پر کیسے ووٹ دے سکتے ہیں؟ آئینی طور پر ان کی شرکت کی اجازت ہی نہیں تھی۔انہوںنے کہاکہ آئین سپریم ہے اور آئین کے مطابق ہی ملک کو چلایا جاتا ہے۔ پی ٹی آئی رہنما نے کہاکہ آئین کے مطابق90دن کے اندر صدر کی جانب سے الیکشن کی تاریخ دی جائے گی۔
