اسلام آباد(این این آئی)سیاسی جماعتوں کی فنڈنگ کی تحقیقات کیلئے پی ٹی آئی کی درخواست پر جماعت اسلامی کے بعد ن لیگ نے بھی درخواست خارج کرنے کی استدعا کردی۔ مسلم لیگ (ن)کی الیکشن کمیشن کو درخواست میں کہاگیاکہ پی ٹی آئی کا کیس ناقابل سماعت ہے۔

الیکشن کمیشن نے درخواست کے قابل سماعت ہونے پر دلائل مانگ لیے،الیکشن کمیشن نے مزید سماعت 15 فروری تک ملتوی کردی۔الیکشن کمیشن کے باہر میڈیا سے گفتگو کرتے ہوئے فرخ حبیب نے کہاکہ ہر سیاسی جماعت کے گوشواروں کی تفصیلات جمع کرانا لازمی ہے،ن لیگ چاہتی ہے ان کے اکاونٹس کی جانچ پڑتال نہ ہو۔ انہوںنے کہاکہ ن لیگ فنڈنگ کیس سیراہ فراراختیارکرناچاہتی ہے۔ انہوںنے کہاکہ اثاثوں کے ذرائع جمع کرانا تمام سیاسی جماعتوں کی ذمہ داری ہے،فارن فنڈنگ کیس میں سماعت پر سماعت ہوتی جارہی ہے ۔ فرخ حبیب نے کہاکہ ہمارے تمام اثاثے کلیئر ہیں ،ہم نے الیکشن کمیشن میں جمع کرادیئے ہیں، پی ٹی آئی نے اکاؤنٹس کاحساب دیا اور ہم مزیدجانچ پڑتال کیلئے تیارہیں۔فرخ حبیب نے کہاکہ الیکشن کمیشن سیاسی جماعتوں کے کیسزمیں اسکروٹنی کمیٹی بنائے ،بہت سی سیاسی جماعتیں ہیں جن پرالزام لگے ہیں کہ وہ فارن فنڈنگ لیتے رہے۔