اسلام آباد(مانیٹرنگ ڈیسک) امریکہ جانے کیلئے وزیراعظم عمران خان نےکفایت شعاری کا عملی مظاہرہ کیا اور شاہانہ پروٹوکول ،خصوصی طیارے کے استعمال سے گریز کیا۔ میڈیا رپورٹس کے مطابق عمران خان نے امریکہ میں 7روزہ قیام کے لیے شاہانہ ہوٹل کی بجائے پی آئی اے کے ہوٹل روزویلٹ کا انتخاب کیا۔

سابق وزیراعظم نواز شریف نے کبھی اس ہوٹل میں ٹھہرنا پسند نہیں کیا تھا جو پاکستان کی قومی فضائی کمپنی پی آئی اے کی ملکیت ہے۔ وزیر اعظم عمران خان کی سات دنوں میں تمام اہم ملاقاتیں اسی ہوٹل میں ہونا طے ہیں۔یہاں یہ بات قابل ذکر ہے کہ سابق وزیراعظم نواز شریف جنرل اسمبلی کے سالانہ اجلاسوں میں شرکت کے لیے جب بھی نیویارک گئے انہوں نے والڈورف اسٹوریا یا نیو یارک پیلس کا ہی انتخاب کیا۔دوسری جانب بھارتی میڈیا نے بھارتی حکمرانوں کو پاکستان کے وزیراعظم عمران خان کی کفایت شعاری سے سیکھنے کا مشورہ دے دیا۔،تفصیلات کے مطابق بھارتی اخبار انڈیا ٹو ڈے نے نے لکھا کہ عمران خان پر طنز کرنے کے بجائے بھارتی رہنماؤں کو ان کے کم لاگت کے امریکی دورے سے کچھ سیکھنا چاہئے، بھارتی وزیراعظم نریندر مودی نے ہیوسٹن میں اپنے شو پیس ایونٹ پر اربوں روپے خرچ کئے اور تعریفیں سمیٹیں جبکہ عمران خان پر کمرشل فلائٹس کے ذریعے جانے پر بھی تنقید کی جارہی ہے۔ بھارتی اخبار کے مطابق سوشل میڈیا پر بھی عمران خان کی کفایت شعاری کا مذاق میمیز بنا کر اڑایا گیا۔ لیکن اصل میں تو بھارتی حکمرانوں کو پاکستان کے وزیراعظم سے سیکھنا چاہئے۔