راولپنڈی (این این آئی)وزیر اعظم عمران خان نے کہا ہے کہ پاکستان حق خود ارادیت دلانے کیلئے کشمیریوں کے ساتھ کھڑا ہے، ہماری افواج کسی بھی بھارتی مہم جوئی کا منہ توڑ جواب دینے کیلئے پوری طرح تیار ہے،بھارت کی جانب سے آزاد کشمیر کے نہتے شہریوں کو جان بوجھ کر نشانہ بنانا،مقبوضہ کشمیر میں طویل محاصرہ انسانی حقوق کی خلاف ورزیوں کی بدترین مثال ہے۔
جمعہ کو پاک فوج کے شعبہ تعلقات عامہ (آئی ایس پی آر) کے مطابق وزیراعظم عمران خان اور آرمی چیف جنرل قمر جاوید باجوہ نے لائن آف کنٹرول کا دورہ کیا۔وزیراعظم اور آرمی چیف کے ہمراہ وزیر خارجہ شاہ محمود قریشی، وزیر دفاع پرویز خٹک اور چیئرمین کشمیر کمیٹی بھی موجود تھے۔آئی ایس پی آر کے مطابق وزیراعظم اور آرمی نے چیف ایل او سی پر تعینات پاک فوج کے جوانوں سے ملاقات کی۔وزیراعظم کو لائن آف کنٹرول کی تازہ ترین صورتحال پر بریفنگ دی گئی۔وزیراعظم نے کنٹرول لائن پر بھارتی جارحیت کا نشانہ بننے والے افراد سے ملاقات کی، شہداء کے اہل خانہ اور زخمیوں سے بھی بات چیت کی۔آئی ایس پی آر کے مطابق وزیراعظم عمران خان نے ایل او سی پر تعینات پاک فوج کے جوانوں کے بلند حوصلے کی تعریف کی اور پاک فوج کی آپریشنل تیاریوں اور بھارت کی سیز فائر معاہدے کی خلاف ورزی کا موثر جواب دینے پر پاک فوج کو سراہا۔آئی ایس پی آر کے مطابق وزیراعظم نے ایل او سی پر شہید اور زخمی ہونے والوں کے لواحقین سے ملاقات کی اور ان کے بلند حوصلوں کو سراہا۔اس موقع پر وزیر اعظم عمران خان نے کہا کہ بھارت آزاد جموں و کشمیر کے نہتے شہریوں کو جان بوجھ کر نشانہ بنارہا ہے۔انہوں نے کہا کہ بھارت کی جانب سے مقبوضہ کشمیر میں طویل محاصرہ انسانی حقوق کی خلاف ورزیوں کی بدترین مثال ہے۔انہوں نے کہا کہ پاکستان حق خود ارادیت دلانے کیلئے کشمیریوں کے ساتھ کھڑا ہے۔وزیر اعظم نے کہا کہ ہماری توجہ فی الحال فاشسٹ بھارتی حکومت کو دنیا کے سامنے بے نقاب کرنے پر ہے۔انہوں نے کہا کہ ہماری افواج کسی بھی بھارتی مہم جوئی کا منہ توڑ جواب دینے کیلئے پوری طرح تیار ہے۔