اسلام آباد(مانیٹرنگ ڈیسک)سابق وزیر اعظم بینظیر بھٹو کے قتل میں مبینہ طور پر ملوث ایک شدت پسند اکرام اللہ نے حال ہی میں طالبان کی جانب سے جاری کی گئی ویڈیو میں خود پر لگائے گئے الزام کی تردید کی ہے۔خیال کیا جاتا رہا کہ  لیاقت باغ میں ہونے والے حملے کے لیے اکرام اللہ متبادل خودکش حملہ آور تھے اور اگر پہلہ حملہ آور اپنے مشن میں ناکام ہوتا تو اکرام اللہ اس مشن پر جاتے۔

اس واقعے کے 11 سال بعد طالبان کے ایک نئے دھڑے کی جانب سے یہ ویڈیو جاری کی گئی جو کہ برطانوی نشریاتی ادارے  نے حاصل کی ہے۔ خیال کیا جا رہا ہے کہ یہ ویڈیو مشرقی افغانستان میں بنائی گئی ہے۔اس ویڈیو میں اکرام اللہ نے 2007 کے حملے کے بارے میں اپنا پہلا بیان دیا ہے اور متعدد بار اس بات کو دہرایا ہے کہ وہ اس کی تیاری میں کسی بھی لمحے ملوث نہیں تھے اور نہ ہی انھیں اس منصوبے کا کوئی علم تھا۔واضح رہے کہ اکرام اللہ پاکستانی حکام کی جانب سے جاری کی گئی مطلوبہ افراد کی فہرست میں شامل ہیں اور عدالتی دستاویزات میں انہیں دوسرا خود کش حملہ آور قرار دیا گیا ہے۔دوسری جانب رحمان ملک نے اکرام اللہ کے اس دعوے کی تردید کی ہے۔برطانوی نشریاتی ادارے سے بات کرتے ہوئے رحمان ملک نے کہا کہ اکرام اللہ مکمل طور پر جھوٹ بول رہا ہے اور کہا کہ اس حملے میں ملوث دوسرے ملزمان نے عدالت میں اس کا نام دوسرے خود کش حملہ آور کی حیثیت سے لیا تھا۔پاکستان میں شدت پسند گروہوں کے حوالے سے معلومات رکھنے والے ایک ذریعے نے بتایا کہ اکرام اللہ حال ہی میں کچھ عرصے قبل تک بینظیر بھٹو پر کیے جانے والے حملے پر فخر کا اظہار کرتا رہا ہے۔تمام پاکستانی طالبان، حتی کے قبائلی علاقے میں رہنے والے بچوں کو بھی علم ہے کہ اکرام اللہ بینظیر بھٹو پر کیے جانے والے حملے میں ملوث تھا۔یاد رہے کہ گذشتہ سال اکرام اللہ پر افغانستان میں مخالف گروہ کی جانب سے حملہ کیا گیا تھا ۔خیال کیا جا رہا ہے کہ ان واقعات کے نتیجے میں اکرام اللہ کو اس کے گروہ کے رہنماؤں نے یہ ویڈیو بنانے کا مشورہ دیا ہے جس میں اس نے بینظیر بھٹو کے قتل میں ملوث ہونے سے انکار کیا ہے۔