اسلام آباد (مانیٹرنگ ڈیسک)ملک بھر میں عید الفطر آج مذہبی جوش و جذبے سے منائی جارہی ہے۔نماز عید کے بڑے بڑے اجتماعات منعقد ہوئے، عید کے پرمسرت موقع پر ملک میں امن واستحکام کے قیام اور امت مسلمہ کی سر بلندی کے لیے خصوصی دعائیں مانگی گئیں۔کراچی، لاہور، اسلام آباد، فیصل آباد، سکھر سمیت ملک کے چھوٹے بڑے شہروں میں عید الفطر کے اجتماعات منعقد کیے گئے۔
بحریہ ٹاؤن لاہور اور کراچی میں بھی عید الفطر کے اجتماعات ہوئے، صدر مملکت ممنون حسین نے اسٹیٹ گیسٹ ہاؤس کراچی میں نماز عید ادا کی۔چیف جسٹس پاکستان جسٹس ثاقب نثار نے گارڈن ٹاؤن لاہور، گورنر سندھ محمد زبیر نے باغ جناح، گورنر پنجاب رفیق رجوانہ نے بادشاہی مسجد،شہباز شریف نے ماڈل ٹاؤن لاہور،خورشید شاہ نے سکھر اور سراج الحق نے منصورہ میں نماز عید ادا کی۔عید اجتماعات کے دوران مساجد، امام بارگاہوں اور جماعت خانوں کی سخت نگرانی کی گئیکراچی میں بھی رینجرز کے جوان تعینات رہے۔ترجمان رینجرز کے مطا بق عید کے موقع پر کسی بھی فرد یا ادارےکو زبردستی فطرہ اکھٹا کرنےکی اجازت نہیں، مشکوک سرگرمی میں ملوث عناصرکی اطلاع فوری رینجرز ہیلپ لائن1101پر دی جائے۔صدرممنون حسین اور نگران وزیراعظم ناصرالملک نے اپنے الگ الگ پیغامات میں عیدالفطر کے پُرمسرت موقع پر قوم اور دنیا بھر کے مسلمانوں کو مبارکباد دی ہے۔ریڈیو پاکستان کے مطابق صدر نے اپنے پیغام میں کہا کہ اسلام کی تعلیمات پر حقیقی معنوں میں عمل درآمد سے ہی معاشرے میں درپیش ناانصافیوں میں کمی لائی جاسکتی ہے۔انہوں نے کہا کہ رمضان المبارک کے دوران مذہبی اور روحانی تجربات سے معاشرے کے کمزور طبقات کی مشکلات کااحساس پیدا ہوتا ہے۔نگران وزیراعظم نے اپنے پیغام میں کہاکہ عیدالفطر رمضان المبارک کی تکمیل کی علامت ہے جس سے خلوص، نظم وضبط، رواداری ،رحمدلی اورقربانی جیسی خصوصیات کو مزید فروغ ملتاہے۔انہوں نے کہا کہ قوم کو آج کے دن اپنے اُن بیٹوں کو بھی یاد رکھنا چاہیے جنہوں نے وطن عزیز کے دفاع کیلئے اپنی زندگیوں کا نذرانہ پیش کیا۔صدر اور وزیراعظم نے زور دیا ہے کہ ہمیں اپنے عزیز و اقارب اور ہمسایوں کے علاوہ تمام ضرورت مند اورمستحق افراد کوبھی زکواة، فطرانہ اور صدقے کے ذریعے مالی امداد کی فراہمی سے عید کی خوشیوں میں شامل کرناچاہیے۔
