اسلام آباد(مانیٹرنگ ڈیسک)ٹکٹ نہ ملنے پر علی محمد خان کے صبر کا پیمانہ لبریز ۔مجھے معلوم تھا کہ سٹیٹس کو کے خلاف بولنے کا ردعمل آئے گا،امید ہے لوٹوں کے بجائے کارکنوں کو اہمیت دی جائے گی۔تفصیلات کے مطابق پی ٹی آئی رہنما علی محمد خان نے نجی ٹی وی سے گفتگو کرتے ہوئے کہا  کہ میں نے کبھی اپنے ذاتی سیاسی مسائل پر ٹی وی پر یا سب کے سامنے بات نہیں کی لیکن اب چونکہ آپ نے سوال کیا ہے تو میں آپ کو جواب دے دیتا ہوں کہ میں پی ٹی آئی اور عمران خان کے ساتھ ایم این اے اور وزارتوں کے چکر کے لیے نہیں ہوں۔

تاہم اب اطلاعات کے مطابق ٹکٹ نہ ملنے پر علی محمد خان کے صبر کا پیمانہ لبریز ہوگیا ہے اور پاکستان تحریک انصاف کے رہنما علی محمد خان کا کہنا ہے کہ مجھے معلوم تھا کہ سٹیٹس کو کے خلاف بولنے کا ردعمل آئے گا۔مجھے امید ہے لوٹوں کے بجائے کارکنوں کو اہمیت دی جائے گی۔ادھرتحریک انصاف کے رہنما علی زیدی نے ایک نجی ٹی وی  سے گفتگو کرتے ہوئے کہا کہ تحریک انصاف کے رہنما علی محمد خان کوٹکٹ جاری کردیا جائے گا۔ ان کو ٹکٹ جاری کرنے کے حوالے سے کچھ مسائل ہیں جو حل کرلئے جائیں گے۔نجی ٹی وی چینل کے پروگرام میں بات چیت کرتے ہوئے انہوں نے کہا کہ تحریک انصاف کی جانب سے 55فیصد امیدواروں کا اعلان کردیا گیا ہے اور اس حوالے سے عمران خان کا پیغام واضح ہے کہ الیکشن میں کامیابی حاصل کرنی ہے۔ انہوں نے کہا کہ علی محمد خان کی جگہ ابھی   کسی کوٹکٹ جاری نہیں کیاگیا اور میری اطلاع کے مطابق کچھ مسائل ہیں جن کے حل ہونے پر ان کو ٹکٹ جاری کردیا جائے گا۔انہوں نے کہا کراچی کی بہت سے نشستوں پراعلان کرنا ابھی باقی ہے۔ تحریک انصاف کے رہنما علی زیدی نے کہا کہ اگر میں الیکشن لڑوں گا تو ڈٹ کر الیکشن لڑوں گا۔