پشاور،اسلام آباد (آن لائن،مانیٹرنگ ڈیسک)پاکستان تحریک انصاف کے چیئرمین عمران خان نے کہا ہے کہ ہماری کوشش ہے کہ چیئرمین سینٹ (ن) لیگ کا نہ ہو اور پیپلزپارٹی کے ساتھ بھی ہمارا چلنا مشکل ہے۔ تفصیلات کے مطابق پشاور پاکستان تحریک انصاف کے چیئرمین عمران خان ورکرز سے خطاب کرتے ہوئے کہا کہ ہماری پوری کوشش ہے کہ چیئرمین سینٹ(ن)لیگ کا نہ ہو اور ہمارا پیپلزپارٹی کے ساتھ چلنا بھی مشکل ہے ۔

(ن) لیگ ڈیڑھ سال سے کوشش کر ہی ہے کہ شریف خاندان کو بچایا جائے۔(ن) شریفوں کی کرپشن کی پارٹی بن چکی ہے۔ سینٹ الیکشن میں لوگوں کے ضمیر خریدنے کے لئے 4 ، 4 کروڑ کی بولی لگائی گئی۔ ہماری پارٹی میں جس نے پیسہ لیا اس کا کیس نیب کو بھیجیں گے اور پارٹی سے نکال دیں گے۔ سینٹ کی چیئرمین شپ بلوچستان کو ملنی چاہئے ۔ادھرن لیگ کی چیئرمین سینٹ کے انتخاب کے حوالے سے بنائی گئی چار رکنی کمیٹی نے نواز شریف کو مطلوبہ سینیٹرز کی تعداد پورا ہونے کی خوشخبری سنا دی۔نجی ٹی وی جیو نیوز کی رپورٹ کے مطابق چیئرمین سینٹ کے انتخاب کیلئے ن لیگ کی بنائی گئی چار رکنی کمیٹی جس میں سپیکر قومی اسمبلی ایاز صادق، سینیٹر مشاہد حسین سید، سینیٹر مشاہد اللہ خان اور وفاقی وزیر ریلوے خواجہ سعد رفیق شامل تھے نے آج نواز شریف کو رپورٹ پیش کر دی ہے۔ رپورٹ میں نواز شریف کو بتایا گیا ہے کہ ن لیگ سینٹ میں اپنا چیئرمین  لانے کی پوزیشن میں آگئی ہے۔ کمیٹی کی رپورٹ میں نواز شریف نے اطمینان کا اظہار کیا ہے۔