اسلام آباد (آن لائن)سابق وزیراعظم نواز شریف نے کہا ہے کہ انہیں وزارت عظمیٰ اور پارٹی صدارت سے نکالا گیا تاہم تم جتنا ظلم کرو گے عوام اتنا ہی مسلم لیگ (ن) کا ساتھ دیں گے ہمارے امیدوار سے شیر کا نشان بھی چھین لیا گیا اور سرگودھا میں بھی ہمارے امیدوار نے کسی اور نشان پر الیکشن لڑا اور کامیاب ہوا، کیا نشان چھینے سے یہ ہمارا نشان مٹا دیں گے پیر کو احتساب عدالت میں مختصر پیشی کے بعد میڈیا سے گفتگو کرتے ہوئے سابق وزیراعظم

نے کہا کہ تم جتنا ظلم کرو گے، عوام اتنا ہی مسلم لیگ (ن) کا ساتھ دیں گے، عوام محسوس کررہے ہیں کہ مسلم لیگ (ن) کا مؤقف بالکل صحیح ہے اور اب میں نہیں کہتا، عوام کہتے ہیں کہ ووٹ کو عزت دو۔نواز شریف نے کہا کہ بغیر کسی وجہ کے وزیراعظم کو باہر نکال کر پھینک دیا گیا، منتخب وزیراعظم کو اس طرح سے نکال کر باہر پھیکنا عوام اب برداشت نہیں کریں گے۔ انہوں نے کہا کہ ظلم برداشت کرتا رہتا ہے اور ظلم کے خلاف کھڑا نہیں ہوتا، وہ سب سے بڑا ظالم ہے، ہم نے غلط اور صحیح میں تفریق کرنا ہے، ملک کے آئندہ 70 سال پچھلے 70 سالوں کی طرح نہیں گزرنے چاہئیں۔سینیٹ انتخابات کے حوالے سے سابق نواز شریف کا کہنا تھا کہ سینیٹ انتخابات میں جہاں پیسہ چلا اور ووٹ خریدے، اس کا حساب کتاب ہونا چاہیے، جس کا ایک رکن بھی صوبے میں نہ ہو وہاں امیدوار کھڑا کرے، یہیں سے دھاندلی لگتی ہے جب کہ ہمارے سینیٹرز نے نشان کے بغیر الیکشن لڑا ، وزیراعظم چور ڈاکو ، سمگلر ، سسیلین مافیا اور گاڈ فادر نہیں ، عوام اب سکھا شاہی برداشت نہیں کریں گے۔ انہوں نے کہا عوام بھیڑ بکریاں ہیں جس کو منتخب کریں چند لوگ اْٹھا کر باہر نکال دیں عوام باشعور ہوتے جا رہے ہیں ، میں نہیں بلکہ عوام کہتے ہیں ووٹ کو عزت دو یہ کسی فرد واحد کا ملک نہیں ہے ، ادھر سے نااہل اورعوام اہل قرار دے رہے ہیں ، تم جتنا ظلم کرو گے عوام اتنا ہی ن لیگ کا ساتھ دیں گے ، فیصلے میں جان ہوتی تو تسلیم کرتے۔