اسلام آباد(آئی این پی )سابق صدر مملکت اور پاکستان پیپلزپارٹی پارلیمنٹیرینز کے سربراہ آصف علی زرداری نے راؤ انوار کی حمایت میں دیئے گئے بیان پر افسوس کااظہارکرتے ہوئے اعتراف کیا کہ یہ الفاظ سیہواً ادا ہوئے ہیں ،کسی کو تکلیف پہنچی تو اس پر افسوس کا اظہار کرتے ہیں ۔ہفتہ کو پیپلزپارٹی پارلیمنٹیرینز کے ترجمان سینیٹر فرحت اللہ بابر کے مطابق سابق صدر نے جمعہ کے روز
ایک پرائیویٹ چینل انٹرویو دیتے ہوئے اپنے ریمارکس جن سے یہ تاثر ملا کہ وہ بھگوڑے سابق ایس ایس پی ملیر راؤ انوار کو سپورٹ کر رہے ہیں پر افسوس کا اظہار کیا ہے۔ پارٹی ترجمان سینیٹر فرحت اللہ بابر نے کہا کہ آصف علی زرداری نے یہ الفاظ سہون ادا کئے اور اگر کسی کو اس سے تکلیف پہنچی ہے تو وہ اس پر افسوس کا اظہار کرتے ہیں۔ سابق صدر نے ہفتہ کو ایک دوسرے ٹی وی انٹرویو میں یہ بات تسلیم کی کہ راؤ انوار کے متعلق ان کے الفاظ سہون ادا ہوئے۔ سابق صدر نے ماورائے عدالت قتل کو مجرمانہ، قابل نفرت اور ناقابل تسلیم قرار دیا اور مطالبہ کیا کہ جو لوگ بھی اس میں ملوث ہیں انہیں انصاف کے کٹہرے میں لایا جائے۔ انہوں نے کہا کہ زبردستی غائب کر دینا اور ماورائے عدالت قتل ایک جیسے جرائم ہیں۔ یہ بات کوئی سوچ بھی نہیں سکتا کہ پاکستان پیپلزپارٹی ایسے اقدامات کی کسی بھی حالت میں سپورٹ کرے گی۔ ترجمان نے کہا کہ اس سلسلے میں پارلیمنٹ کے اندر اور باہر پارٹی کا ریکارڈ خود بولتا ہے۔ سابق صدر کو اس بات کا احساس ہے کہ گفتگو کی روانی میں ان کے الفاظ سے تکلیف پہنچی ہوگی اور وہ اس پر افسوس کا اظہار کرتے ہیں۔
