خانیوال (آن لائن)صوبے پنجاب میں لاہور سے راجن پور جانے والی بس تیز رفتاری کے باعث ٹرا لر سے ٹکرا گئی جس کے نتیجے میں خواتین اور بچوں سمیت 11 افراد جا ں بحق اور 21 زخمی ہوگئے۔ تفصیلا ت کے مطابق لاہور سے راجن پور جانے والی بس خانیوال کے قریب ایم۔4 موٹر وے انٹرچینج پر شدید دھند میں تیز رفتاری کے باعث موڑ پر

ایک ٹرا لر سے ٹکرا کر الٹ گئی ۔رپورٹ میں مزید بتایا گیا کہ اس مسافر بس میں تقریباً 40 سے زائد مسافر سوار تھے۔ ٹریفک حادثے کے زخمیوں کو نشتر ہسپتال ملتان منتقل کیا گیا، جہاں ہسپتال ذرائع نے بتایا کہ زیادہ تر زخمیوں کی حالت تشویشناک ہے۔حادثے میں ہلاک ہونے والوں میں خواتین اور بچے بھی شامل ہیں۔واضح رہے کہ موسم سرما میں پاکستان کی شاہراہوں پر حادثات کی شرح بڑھ جاتی ہے جس کی اہم وجہ دھند بتائی جاتی ہے۔خیال رہے کہ صبح سویرے بہاولپور سے رحیم یارخان حد نگاہ صفر سے 50 میٹر تک تھی۔رواں ہفتے صوبہ پنجاب کے علاقے راجن پور میں ٹرک نے کار کو کچل دیا تھا جس کے نتیجے میں کار میں سوار 3 ایف سی اہلکار جاں بحق اور 3 زخمی ہوگئے تھے جبکہ ٹرک ڈرائیور فرار ہوگیا تھا۔اس سے قبل شانگلہ اور بٹاگرام کے اضلاع میں دو مختلف حادثات میں 5 افراد جاں بحق ہوئے، جن میں 3 فوجی اہلکار بھی شامل تھے۔

موضوعات:حادثہ موٹروے