لاہور(آئی این پی+نیوزڈیسک)خبر رساں ادارے آئی این پی کے مطابق پاکستانیوں کیلئے دبئی کا وزٹ ویزا بند کردیاگیا ہے جبکہ کرسمس اور سالِ نو کے موقع پر تقریبا 3 لاکھ پاکستانی دبئی پہنچ گئے ہیں جس کے بعد پاکستانیوں کے لیے دبئی کا وزٹ ویزا عارضی طور پر بند کردیا۔چیئرمین ٹریول ایجنٹس ایسوسی ایشن نعیم شریف کے مطابق گذشتہ روز دبئی کے وزٹ ویزے کے لیے بھیجی گئیں
تمام درخواستیں بغیر وجہ بتائے مسترد کردی گئیں اس کے علاوہ پاکستانی شہریوں کو تاحکم ثانی دبئی وزٹ ویزے کے لیے مزید درخواستیں جمع کرانے سے بھی روک دیا ہے ایسوسی ایشن کے نائب صدر ندیم شریف کے مطابق اس وقت تقریبا تین لاکھ پاکستانی دبئی میں موجودہیں جب کہ مزید ہزاروں افراد دبئی جانے کے خواہش مند ہیں انہوں نے کہا کہ ممکن ہے کہ وزٹ ویزا پر پابندی بڑی تعداد میں پاکستانیوں کی دبئی میں موجودگی کی وجہ سے لگائی گئی ہو تاہم یہ پابندی وقتی ہے جو کہ آئندہ برس جنوری میں ختم کردی جائے گی۔دریں اثناء دبئی میں پاکستان قونصلیٹ نے اس قسم کی کسی بھی پابندی کی تردید کردی ہے ،امارات حکومت نے بھی ایسی کسی پابندی کی تردید جاری کی ہے حکام کا کہنا ہے کہ ویزوں کا اجراء معمول کے مطابق جاری ہے اور کسی قسم کی پابندی عائد نہیں کی گئی،سیاحوں کو پیغام دیاگیا ہے کہ وہ معمول کے مطابق ویزا حاصل کرنے کے بعد دبئی آسکتے ہیں۔
