اسلام آباد (مانیٹرنگ ڈیسک)سینئر صحافی اور تجزیہ کار چوہدری غلام حسین نے نجی ٹی وی پروگرام میں گفتگو کرتے ہوئے دعویٰ کیا ہے کہ  نا اہل سابق وزیر اعظم نواز شریف کی صاحبزادی مریم نواز اس وقت جنگی راستے پر گامزن ہیں۔ جہاں لڑائی ، محاذ آرائی ، مار کٹائی اور تباہی ہو گی ۔ چوہدری غلام حسین نے انکشاف کیا ہے کہ مریم نواز خاموشی سے اپنے عزیز و اقارب اور اپنے بچوں کے عزیزو اقارب کے ذریعے کاروباری لوگوں اور سرمایہ

داروں سے رابطہ کر رہی ہیں۔ان میں سے کسی کے پاس کوئی بینک  ہے، کسی کے پاس ہاﺅسنگ سکیم ہے ،اور کسی کے پاس اربوں روپے کے ٹھیکے ہیں، مریم نواز کے حکم پر ان تمام لوگوں سے اپنے عزیزوں کے ذریعے انہوں نے پیغام بھجوایا ہے کہ ہمیں ایک ارب روپے پہنچا دیں، ہم نے تحریک چلانی ہے، عدلیہ اور فوج کے خلاف محاذ آرائی کرنی ہے اور اپنے سیاسی مخالفین کو نیچا دکھانا ہے۔ چوہدری غلام حسین نے مزید کہا کہ  مریم نواز اس کے علاوہ 20 لوگوں کی فہرست  بھی بنائی ہے اور کہہ دیا ہے کہ ہمیں بیس ارب روپے چاہئیں۔کسی سے ایک ارب ، کسی سے دو ارب ، کسی سے پچاس کروڑ روپے دینے کا کہا گیا ہے۔ چوہدی غلام حسین نے پروگرام کے دوران کہا کہ میں چیلنج دے رہا ہوں کہ نواز شریف ، مریم نواز یا ان کے وزیر مشیر ان تمام باتوں کی تردید کریں جس کے بعد ہم پھر ثبوت لائیں گے۔یہاں یہ بات واضح رہے کہ تحریک انصاف یا پیپلز پارٹی کے برعکس حکمران جماعت ن لیگ تاحال باقاعدہ طور پر اپنی انتخابی مہم کا آغاز نہیں کرسکی ہے۔