اسلام آباد(این این آئی) وزیرمملکت برائے اطلاعات ونشریات مریم اور نگزیب نے کہاہے کہ آرمی پبلک سکول پشاور کے بچے ہمارے سن شہید ہیں ٗ دہشتگردی اسلام ٗ پاکستان اور عوام کے خلاف دشمنوں کی سازش ہے ٗ معصوموں کی قربانی کو ہمیشہ یاد رکھیں گے اور آخری دہشت گرد کے خاتمے تک چین سے نہیں بیٹھیں ۔ وزیرمملکت اطلاعات ونشریات مریم اورنگزیب نے
شہداء اے پی ایس کی برسی پر اپنے پیغام میں کہاکہ آرمی پبلک سکول پشاور کے بچے ہمارے کم سن شہید ہیں۔ انہوں نے کہا کہ ان شہداء کی قربانی سے پوری قوم دہشت گردی کے خلاف ایک زبان ہوکر صف آراء ہوئی۔انہوںنے کہاکہ دہشت گردی اسلام،پاکستان اور عوام کے خلاف دشمنوں کی سازش ہے۔
انہوںنے کہا کہ دہشت گردوں نے رنگ ونسل ومذہب وعقیدہ اور عمر وجنس کے کسی امتیاز کے بغیر پاکستانیوں کو نشانہ بنایا۔ انہوںنے کہا کہ سابق وزیراعظم محمد نوازشریف کے ویژن کے تحت اٹھائے گئے اقدامات اور پاکستان کی مسلح افواج، پولیس اور قانون نافذ کرنے والے اداروں کی بے مثال قربانیوں سے ملک میں امن بحال ہوا۔ انہوںنے کہاکہ دہشت گردی کے خاتمے کے لئے ہمارے بہادر جوانوں اور افسروں کی قربانیاں رائیگاں نہیں جائیں گی۔
انہوںنے کہاکہ سانحہ اے پی ایس کے دل سوز واقعے نے پوری قوم کو دہشت گردی کی عفریت کے خلاف متحد کیا۔انہوںنے کہا کہ ہم ان معصوموں کی قربانی کو ہمیشہ یاد رکھیں گے اور آخری دہشت گرد کے خاتمے تک چین سے نہیں بیٹھیں گے ۔انہوںنے کہا کہ اے پی ایس سمیت تمام شہداء کے خاندانوں کو سلام عقیدت پیش کرتے ہیں۔ ان کے عزم وحوصلے قابل فخر ہیں۔
