اسلام آباد(مانیٹرنگ ڈیسک)چیئرمین پی ٹی آئی عمران خان بچ نکلے ، نا اہلی کیس میں سپریم کورٹ نے محفوظ فیصلہ سنادیا۔ ن لیگ کے رہنما حنیف عباسی کی دائر درخواست پر فیصلہ سناتے ہوئے چیف جسٹس آف پاکستان جسٹس ثاقب نثارکی سربراہی میں تین رکنی بنچ نے کمرہ نمبر 1میں کیس کا محفوظ فیصلہ سناتے ہوئےعمران خان کو کلین چٹ دیدی ہے۔ فیصلے کے مطابق چیئرمین تحریک انصاف عمران خان نااہلی سے بچ نکلے ہیں ۔ن لیگ کے رہنما حنیف عباسی
نےاپنی دائر درخواستوں پر موقف اختیار کیا تھا کہ عمران خان اور جہانگیر ترین کو آرٹیکل 62، 63کے تحت نا اہل قرار دیا جائے کیونکہ عمران خان نے 2013ء میں اپنے کاغذات نامزدگی میں بنی گالہ کی اراضی سے متعلق جھوٹ بولاہے جبکہ فارن فنڈنگ کیس کے حوالے سے دائر درخواست میں موقف اختیار کیا گیا ہے کہ پی ٹی آئی فارن فنڈنگ سے چل رہی ہے جس کی قانون اجازت نہیں دیتا اور ایسی پارٹی ملکی قانون کے تحت انتخابات نہیں لڑ سکتی۔
