اسلام آباد (مانیٹرنگ ڈیسک)پاکستان نے جمعہ کو بھارتی ڈپٹی ہائی کمشنر جے پی سنگھ کو دفتر خارجہ طلب کر کے ایل او سی پر چیری کوٹ سیکٹر میں بھارتی قابض افواج کی طرف سے سیز فائر کی خلاف ورزی پر احتجاج کرتے ہوئے واقعہ کی مذمت کی ہے ۔چیری کوٹ سیکٹر

کے گاؤں چافر میں نماز جنازہ کی ادائیگی کے دوران گزشتہ روز بھارتی قابض افواج کی جانب سے بلا اشتعال فائرنگ کے نتیجے میں شوکت اور اقبال نامی دو شہری شہید اور چار زخمی ہوگئے تھے۔دفتر خارجہ کے ترجمان کے مطابق ڈائریکٹر جنرل (جنوبی ایشیاء و سارک)نے جمعہ کو بھارتی ڈپٹی ہائی کمشنر کو طلب کر کے بھارتی فورسز کی جانب سے بلا اشتعال فائرنگ پر احتجاجی مراسلہ ان کے سپرد کیا۔ دفتر خارجہ کے مطابق ضبط و تحمل کے مطالبے کے باوجود بھارت کی طرف سے جنگ بندی کی مسلسل خلاف ورزی جاری ہے۔ بیان کے مطابق بھارت نے رواں سال کے دوران اب تک کنٹرول لائن اور ورکنگ باونڈری پرجنگ بندی کی 1300 سے زائد خلاف ورزیاں کی ہیں، جن کے نتیجے میں 54 افراد شہید اور 174 زخمی ہوئے۔ترجمان کے مطابق معصوم شہریوں کو جان بوجھ کر نشانہ بنانا ایک گھناؤنا،انسانی وقار اور بین الاقوامی انسانی حقوق کے منافی اقدام ہے۔ بھارت پر زور دیا گیا کہ وہ سیز فائر معاہدے کی پابندی کرتے ہوئے اپنی فورسز کو سیز فائر معاہدے پر عملدرآمد کا پابند بنائے۔