ملتان (مانیٹرنگ ڈیسک) سینئرسیاستدان مخدوم جاویدہاشمی نے ملاقات میں مسلم لیگ(ن)کے قائد میاں نوازشریف کو ملتان میں جلسہ کی دعوت دے دی، ذرائع کے مطابق جاوید ہاشمی کی میزبانی میں جلسہ رواں ماہ دسمبرکے آخری ہفتے میں منعقد ہوگاجس میں سینئرسیاستدان مخدوم جاوید ہاشمی سابق وزیراعظم میاں نوازشریف کی موجودگی میں مسلم لیگ(ن)میں باقاعدہ طور پر شمولیت کا اعلان کریں گے،ذرائع کے مطابق جنوبی پنجاب میں عمران خان کے
حالیہ جلسوں اور 15دسمبرکو بلاول بھٹوزرداری کے ملتان میں منعقدہ جلسہ کے بعد یہ جلسہ مسلم لیگ(ن)کا ملتان میں ایک بڑا پاورشو ہوگا جس میں جنوبی پنجاب بھرسے پارٹی عہدیدران،اراکین اسمبلی اورکارکنان شریک ہوکر میاں نوازشریف کی قیادت میں پارٹی کے متحد ہونے کا پیغام دیں گے۔ذرائع نے یہ بھی دعوی کیا ہے کہ ملتان جلسہ میں میاں نوازشریف کی طرف سے جاوید ہاشمی کو پارٹی میں مرکز ی اورجنوبی پنجاب کی سطح پراہم ذمہ داریاں دی جانے کا امکان ہے۔دریں اثناء مسلم لیگ(ن)ملتان کی ضلعی قیادت نے جاوید ہاشمی کی پارٹی میں واپسی کا خیرمقدم کرتے ہوئے کہا ہے کہ مسلم لیگ ن کے دروازے جاوید ہاشمی کے لیے کھلے ہیں۔ سب کو اس فیصلے کو قبول کرنا ہوگا۔میاں نواز شریف اور جاوید ہاشمی کی ون ان ون ملاقات پر لیگی کارکنان بہت خوش ہیں،سینئرسیاستدان کا ملتان آمد پربھرپوراستقبال کریں گے،ان خیالات کا اظہارپاکستان مسلم لیگ ن ضلع ملتان کے عہدیداران سینئر نائب صدر ضلع شاہد مختیار لودھی،سینئر رہنما ارشد بوٹا ،منیر لنگاہ، عابد باکسر، امیر بخش کمبوہ، راو ابرار نے پریس کانفرنس کرتے ہوئے کیا۔،انہوں نے کہاکہ مخدوم جاوید ہاشمی کی ن لیگ میں واپسی پر جو لوگ مخالفانہ بیانات دے رہے ہیں انہوں نے ڈسپلن کی خلاف ورزی کی ہے۔انکے خلاف ورکنگ کمیٹی مسلم لیگ ن کاروائی کرے۔ جاوید ہاشمی سینئر سیاستدان اہیں جمہوریت کے لیئے انکی بے بہا خدمات اور قربانیاں ہیں۔