اسلام آباد(مانیٹرنگ ڈیسک )وزیراعظم نوازشریف نے کہا ہے کہ پاکستانی مارکیٹ سرمایہ کاروں کے لئے پرکشش ہے، امریکی منڈیوں تک پاکستان کی رسائی سے دوطرفہ تعلقات مزید مستحکم ہوں گے،امریکی چیمبرآف کامرس اپنی حکومت کوترجیحی رسائی پرقائل کرے۔نیویارک میں پاک امریکا بزنس کونسل کی تقریب سے خطاب میں وزیراعظم نوازشریف نے کہاکہ اقتدار سنبھالنے کے بعد معاشی ترقی اورامن کیلئے ٹھوس اقدامات کیے۔ مؤثرمعاشی اصلاحات کی بدولت اقتصادی اشاریوں میں نمایاں بہتری آئی،معاشی ترقی میں اضافہ اوربجٹ خسارہ کم ہوا ہے۔ تقریب سے خطاب کرتے ہوئے وزیراعظم نے کہا کہ امریکا پاکستان کا اہم اقتصادی وتجارتی شراکت دارہے اور یہ شراکت داری نجی شعبے کیلئے بہت اہم ہے۔ امریکہ پاکستان کو ترجیحی بنیاد پر اپنی منڈیوں تک رسائی دے تاکہ دوطرفہ تجارت،معیشت اورسرمایہ کاری کے شعبوں میں مزید وسعت پیدا ہوسکے۔
وزیر اعظم نے کہا کہ پاکستان میں مہنگائی کی شرح 47 برس کی کم ترین سطح 3 فیصد پر آ چکی ہے اور شرح سود بھی چار دہائیوں میں کم ترین ہے۔ معاشی ترقی کی شرح ایک دہائی میں سب سے زیادہ چار اعشاریہ سات فیصد ہے۔ انہوں نے کہا کہ بیس کروڑ صارفین کی پاکستانی مارکیٹ سرمایہ کاروں کے لئے پرکشش ہے۔ پاکستان میں تیل، گیس ،توانائی ، بنیادی ڈھانچے اور آئی ٹی سمیت متعدد شعبوں میں سرمایہ کاری کے مواقع موجود ہیں۔ نواز شریف نے کہا دونوں ملکوں کے درمیان تجارتی حجم میں اضافے کے لئے بھی اقدامات کی ضرورت ہے۔تقریب میں پاکستان اور امریکہ سے تعلق رکھنے والے کاروباری افراد نے بھرپور شرکت کی۔ اس موقع پر اقوام متحدہ میں پاکستان کی مستقل مندوب ملیحہ لودھی اور سیکریٹری خارجہ اعزاز چوہدری سمیت کئی اعلیٰ حکام موجود تھے۔تقریب میں معروف امریکی کمپنیوں کے نمائندوں ، تاجروں اور سرمایہ کاروں نے شرکت کی۔

موضوعات:نواز شریف