اسلام آباد(نیوز ڈیسک) قومی اسمبلی میں قائد حزب اختلاف سید خورشید شاہ نے کہا ہے کہ ہارس ٹریڈنگ جمہوری نظام کے لیے کینسر ہے لیکن اس کے لئے آئین میں ترمیم افسوسناک ہے۔ میڈیا سے بات کرتے ہوئے خورشید شاہ نے کہا کہ ہارس ٹریڈنگ جمہوری نظام کے لیے کینسر ہے لیکن بدقسمتی سے اس میں ملوث افراد بہت مضبوط ہوگئے ہیں اور اس کی وجہ غیر جماعتی انتخابات ہیں۔ افسوس ہے کہ ہارس ٹریڈنگ روکنے کے لیے آئین میں ترمیم ہو رہی ہے، میرا مشورہ ہے کہ آئین پر یہ بدنما داغ نہ لگایا جائے۔ انہوں نے کہا کہ تمام سیاسی جماعتوں کو بیٹھ کر اس کا حل نکالنا چاہیے کیونکہ سیاسی جماعتیں ہی اپنے کارکنوں کے بجائے پیسے دینے والوں کو امیدوار نامزد کرتی ہیں۔