اسلام آباد (نیوز ڈیسک)بھارتی ریاست اتر پردیش کے شہر علی گڑھ سے ایک حیران کن واقعہ سامنے آیا ہے جہاں ایک نوجوان اپنی منگیتر کی ماں کے ساتھ گھر سے فرار ہو گیا، جس پر اس کے والد نے اسے خاندان سے عاق کر دیا ہے۔ذرائع کے مطابق، 24 سالہ راہول نامی نوجوان گھر سے شیروانی خریدنے کے بہانے نکلا لیکن پھر لوٹ کر نہیں آیا۔ بعد ازاں معلوم ہوا کہ وہ اپنی ہونے والی ساس، جو عمر میں اس سے دس سال بڑی ہے، کے ساتھ غائب ہو چکا ہے۔

راہول کے والد نے اس واقعے پر شدید غم و غصے کا اظہار کرتے ہوئے کہا کہ ان کے بیٹے نے خاندان کی عزت خاک میں ملا دی ہے، اور اب وہ اس کے ساتھ کسی بھی قسم کا تعلق نہیں رکھنا چاہتے۔ انہوں نے مزید الزام عائد کیا کہ راہول جاتے ہوئے گھر سے زیورات اور نقد رقم بھی لے گیا ہے۔نیوز 18 کی رپورٹ کے مطابق، دلہن کے والد جتیندر کمار نے انکشاف کیا کہ راہول اس سے قبل بھی دو مختلف خواتین کے ساتھ فرار ہو چکا ہے، تاہم ہر بار واپس آ گیا تھا۔ ان کا کہنا تھا کہ ان کی بیٹی کی شادی 16 اپریل کو ہونا طے تھی، مگر اپنی اہلیہ کے اس اقدام سے ان کا پورا خاندان صدمے سے دوچار ہو گیا ہے۔شادی کے تمام انتظامات مکمل کر لیے گئے تھے، جن میں لاکھوں روپے مالیت کے زیورات اور نقدی شامل تھی، جو اب لاپتہ ہیں۔

اہل خانہ نے واقعے کی رپورٹ مقامی پولیس اسٹیشن میں درج کروا دی ہے اور جوڑے کی تلاش جاری ہے۔پولیس کا کہنا ہے کہ ابتدا میں دونوں کو اتراکھنڈ اور پھر گجرات میں دیکھا گیا، تاہم وہ گرفتاری سے بچنے میں کامیاب ہو گئے۔

اب اطلاع ہے کہ یہ جوڑا بہار میں موجود ہے اور ایک پولیس ٹیم کو وہاں روانہ کر دیا گیا ہے۔علی گڑھ کے ڈی ایس پی مہیش کمار کے مطابق، راہول کے رشتہ داروں اور دوستوں سے تفتیش کی جا رہی ہے۔ پولیس کو شبہ ہے کہ راہول کے بہنوئی نے اس فرار میں مدد فراہم کی، لیکن اس نے ان الزامات کی تردید کی ہے۔راہول کے والد نے یہ بھی دعویٰ کیا ہے کہ خاتون نے ان کے بیٹے پر جادو کا اثر ڈالا ہے، اور اس کے جسم پر تعویذ باندھے گئے تھے۔ پولیس کو دونوں کے موبائل فون بند ملے ہیں، جس سے ان کی تلاش میں رکاوٹیں پیدا ہو رہی ہیں۔