اسلام آباد (نیوز ڈیسک) یوکرین سے تعلق رکھنے والی 20 سالہ ماڈل ماریا کووالچک، جو 10 دن سے لاپتہ تھیں، دبئی میں ایک سڑک کے کنارے شدید زخمی حالت میں پائی گئیں۔ میڈیا رپورٹس کے مطابق، وہ 9 مارچ کو متحدہ عرب امارات میں ایک ہوٹل میں منعقدہ پارٹی میں شرکت کے بعد لاپتہ ہو گئی تھیں۔ ان کے اہلِ خانہ کو اس وقت تشویش لاحق ہوئی جب وہ 11 مارچ کو دبئی سے تھائی لینڈ کے لیے اپنی طے شدہ پرواز پر نہ پہنچ سکیں۔
ماریا کو 19 مارچ کو ایک سڑک کے قریب پایا گیا، جہاں وہ بری طرح زخمی تھیں، ان کی ریڑھ کی ہڈی سمیت متعدد ہڈیاں ٹوٹی ہوئی تھیں۔ انہیں فوری طور پر اسپتال منتقل کیا گیا، جہاں ان کی کئی پیچیدہ سرجریاں کی گئیں۔ دبئی پولیس نے تصدیق کی ہے کہ لاپتہ یوکرینی خاتون کو بازیاب کر لیا گیا ہے اور وہ زیرِ علاج ہیں، جبکہ ان کے اہلِ خانہ بھی اسپتال میں موجود ہیں۔
این ڈی ٹی وی کی رپورٹ کے مطابق، پولیس تحقیقات میں یہ بات سامنے آئی کہ ماریا کووالچک نے ایک “زیر تعمیر عمارت” میں داخل ہونے کے بعد اونچائی سے گرنے کے باعث چوٹیں کھائیں۔ تاہم، ان کے اہلِ خانہ نے اس سرکاری بیان پر عدم اطمینان کا اظہار کرتے ہوئے کہا کہ انہیں یقین نہیں آتا کہ وہ کسی زیر تعمیر عمارت سے گری ہیں۔
ماریا کی والدہ کا کہنا ہے کہ ان کی بیٹی کو طبی سہولیات فراہم کی جا رہی ہیں اور وہ جلد صحت یاب ہو جائیں گی، مگر ساتھ ہی انہوں نے انکشاف کیا کہ ماریا کے پاس نہ تو کوئی شناختی دستاویزات ہیں، نہ موبائل فون، اور سرجری کے بعد وہ بات بھی نہیں کر پا رہی ہیں۔
لاپتہ ہونے سے قبل، ماریا نے اپنی والدہ کو اطلاع دی تھی کہ وہ دو ایسے افراد کے ساتھ وقت گزار رہی ہیں جو خود کو ماڈلنگ انڈسٹری کے نمائندے ظاہر کر رہے تھے، اور اسی وجہ سے انہوں نے تھائی لینڈ جانے کا ارادہ ترک کر دیا تھا۔ ہوٹل میں ہونے والی پارٹی کے بعد سے ان کے اہلِ خانہ کا ان سے کوئی رابطہ نہیں ہو سکا تھا۔
یہ واقعہ کئی سوالات کو جنم دے رہا ہے، اور پولیس کی جانب سے مزید تحقیقات جاری ہیں تاکہ معلوم کیا جا سکے کہ ماڈل کے ساتھ اصل میں کیا واقعہ پیش آیا۔
