شارجہ(این این آئی) شارجہ پولیس نے تین دن میں 14 ہزار درہم (10 لاکھ پاکستانی روپے) جمع کرنیوالا بھکاری گرفتارکرلیا۔غیر ملکی میڈیا کے مطابق مقامی شہری نے پولیس کو اطلاع دی تھی کہ مسجد کے باہر ایک شخص مالی مشکلات کا دعوی کرتے ہوئے بھیک مانگ رہا ہے، پولیس نے موقع پر پہنچ کر اس کی شناختی تفصیلات چیک کیں تو معلوم ہوا کہ وہ ملک میں غیر قانونی طور پر مقیم ہے۔

گداگری اور سٹریٹ وینڈرز کی نگرانی کیلئے قائم خصوصی ٹیم کے سربراہ بریگیڈیئر جنرل عمر الغزال الشامسی نے بتایا کہ یہ عمل سیکیورٹی اور سماجی مسائل پیدا کر سکتا ہے۔ انہوں نے عوام کو خبردار کیا کہ گداگر اکثر ہمدردی کے جذبات کو استعمال کر کے غیر قانونی طور پر بڑی رقم کما لیتے ہیں۔شارجہ پولیس نے ‘بھیک مانگنا جرم ہے، دینا ذمہ داری ہے’کے عنوان سے ایک مہم شروع کر رکھی ہے، جو رمضان کے آغاز سے جاری ہے۔ اس مہم کے تحت سادہ لباس اور سیکیورٹی اہلکاروں کی ٹیمیں تعینات کی گئی ہیں تاکہ گداگری کے رجحان کو روکا جا سکے۔حکام نے عوام سے اپیل کی ہے کہ وہ بھکاریوں کو پیسے نہ دیں اور کسی بھی مشتبہ سرگرمی کی اطلاع پولیس ہیلپ لائن 80040یا کال سینٹر 901پر دیں۔