اسلام آباد (این این آئی)یورپی یونین کی قرارداد پر جے یو آئی نے کہا ہے کہ پاکستان کی معاشی ،خارجہ اور دفاعی پالیسی پر بیرونی دباؤ کے بعد مذہبی عقائد پر وار ہے۔اسلم غوری نے اپنے بیان میں کہاکہ حکومت ،وزیر خارجہ اور وزارت خارجہ مجرمانہ غفلت کا مرتکب ہوئی ہے۔وزارت خارجہ کے ایسے افسران سے باز پرس کی جائے۔ اسلم غوری نے کہاکہ یورپی یونین میں اس قرارداد کا
پاس ہونا سفارتکاروں اور اور دفتر خارجہ کے اہلکاروں کی نااہلی ہے۔انہوںنے کہاکہ نیازی سرکار کے آنے کے بعد تسلسل سے معیشت گرتی جارہی ہے ،اسرائیل تسلیم کرنے سمیت ناموس رسالت کا مسئلہ یورپی یونین کی قرارداد کے باعث سنگین صورتحال اختیار کر گیا ہے۔انہوںنے کہاکہ جمعیت علماء اسلام اس قرارداد کی بھرپور مذمت کرتی ہے اور اسے پاکستانی مسلمانوں کے جذبات سے کھیلنے کے مترادف قرار دیتی ہے۔انہوںنے کہاکہ توہین رسالت کی سزا میں ترمیم کسی صورت برداشت نہیں،حکومت سے تو کوئی خیر کی توقع نہیں تاہم عوام کو اس مسئلے پر یورپی یونین کی قرارداد کا بھر پور مقابلہ کرنا ہوگا۔اسلم غوری نے کہاکہ ناموس رسالت اور نبی کریم صلی اللہ علیہ وسلم کی ذات سے بڑھ کر ایک مسلمان کے لئے کوئی چیز نہیں ،یہ ہمارے ایمان کا حصہ ہے۔اسلم غوری نے کہاکہ نااہل حکومت کے آنے کے بعد قومی اور عالمی سطح پر قادیانی اور ان کے پروردہ متحرک ہوچکے ہیں،حکومت ہوش کے ناخن لے اور یورپی یونین پر پاکستانی مسلمانوں کے جذبات واضح کرے۔
