تہران (این این آئی)ایران کے رہبرِاعلی آیت اللہ علی خامنہ ای نے کہا ہے کہ ان کا ملک امریکا کے فضائی حملے میں جنرل قاسم سلیمانی کی ہلاکت کو کبھی نہیں بھولے گا اور امریکا سے اس قتل کا بدلہ لے گا۔عرب ٹی وی کے مطابق انھوں نے یہ بات تہران میں عراقی وزیراعظم مصطفی الکاظمی سے ملاقات میں گفتگو کرتے ہوئے کہی ہے۔
عراقی وزیراعظم نے قبل ازیں ایرانی صدر حسن روحانی سے بھی ملاقات کی ہے اور ان سے دوطرفہ تعلقات سے متعلق امور پر تبادلہ خیال کیا ۔خامنہ ای نے دعوی کیا کہ امریکا ایک آزاد اور مضبوط عراق نہیں چاہتا ہے۔ایران عراق کے امریکا کے ساتھ دوطرفہ تعلقات میں کوئی مداخلت نہیں کرنا چاہتا ہے لیکن اپنے عراقی دوستوں سے یہ ضرور توقع کرتا ہے کہ امریکا کی کسی بھی ملک میں موجودگی کرپشن اور تباہی کا ذریعہ ہوتی ہے اور عراقیوں کو یہ بات جان لینی چاہیے۔انھوں نے مزید کہا کہ ایران نے کبھی عراق کے داخلی امور میں مداخلت کی ہے اور نہ وہ ایسا کرے گا۔وہ ایسے ہر اقدام کا مخالف ہے جس سے عراقی حکومت کم زور ہوتی ہو۔ایران اور عراق کے درمیان تعلقات کے فروغ کے امریکا کی قیادت میں یقینی طور پر مخالفین بھی موجود ہیں لیکن ہمیں کسی بھی طرح امریکا سے خوف زدہ نہیں ہونا چاہیے کیونکہ وہ کچھ بھی نہیں کرسکتا ہے۔
